НЭМҮТ-ийн Хоол судлалын албаны Эрдэм шинжилгээний ажилтан Б.Туул “Цэцэрлэгийн насны хүүхдийн хооллолт” сэдвээр мэдээлэл хүргэжээ.
-Цэцэрлэгийн насны хүүхдийн хооллолтын онцлог юу вэ?
-Цэцэрлэгийн нас буюу 2-5 насанд хүүхдийн өсөлт эрчимтэй явагддаг. Тухайлбал 2-5 насны хүүхдүүд жилд дунджаар 7-8 см өсөж, биеийн жин нь 1.8-2.7 кг-аар нэмэгддэг. Иймээс 2-5 насны хүүхдийн хооллолтод маш сайн анхаарч, хүүхдэд эрчимтэй өсөлт хөгжилтөд хангалттай хэмжээний шим тэжээллэг хоол өгөх хэрэгтэй.
Мөн зөв, зохистой хооллож сурах дадал бага наснаас тавигддаг тул хүүхдээ багаас нь олон төрлийн хүнс хэрэглэж сургах, хүнсний ногоо, жимс, жимсгэнэ хэрэглүүлж сургах зэрэг зохистой хооллолтын дадал хэвшилд сургаснаар насанд хүрээд зохистой хооллох хэвшилтэй болдог.
-Цэцэрлэгийн насны хүүхэд хоногт хэр хэмжээний илчлэг авах шаардлагатай байдаг вэ?
-Цэцэрлэг, сургуулийн хүүхдийн хоногт хоол хүнснээс авах илчлэг, шим тэжээлийн хэмжээг баталсан Эрүүл мэнд, боловсрол, сангийн сайдын хамтарсан тушаал 2020 онд батлагдсан. Энэхүү тушаалд зааснаар 4-6 насны хүүхэд өдөрт 1402 ккал илчлэгийг авна. 24 цагийн үйл ажиллагаатай цэцэрлэгт илчлэгийн 100 хувь, өдрийн 8 цагийн үйл ажиллагаатай цэцэрлэгт 80 хувийг нь цэцэрлэгийн хоол хүнсээр хангана гэж заасан байдаг.
–2-5 насны хүүхдийн хоол ер нь ямар байх хэрэгтэй бол?
– Энэ насны хүүхдүүд зарим тохиолдолд хоол идэх дургүй байдаг. Иймээс хоолны дуршлыг нь сайжруулахын тулд хоолыг өнгө хосолсон, тод гоё өнгөтэй хийх, хэлбэр дүрс оруулж өгвөл хүүхдийн хоолны дуршил нэмэгддэг. Мөн хурц үнэргүй, идэхэд зөөлөн, давс султай, бага хэмжээтэй, халуун бүлээн байх хэрэгтэй. Хүүхдийг хүчээр идүүлэх гэж шаардах, хүчлэх хэрэггүй. Бага багаар дасгаж өгөх хэрэгтэй.
Хүүхэд хооллох орчин нь ая тухтай, анхаарал сарнихааргүй байх хэрэгтэй. Жишээлбэл зурагтаа унтраах, хүүхдээ хооллохдоо гар утсаа оролдохгүй байх, хүүхдийн анхаарал сарних зүйлсийг хийхгүй байхад эцэг эхчүүд анхаарах нь зүйтэй.
НЭМҮТ