-Бие махбодод олон өөрчлөлт гарах энэ шилжилтийн үед ямар амин дэм, эрдэс бодисыг хоол хүнснээс түлхүү авах нь чухал байдаг, түлхүү хэрэглэвэл зохих, хоригловол зохих хүнс?
-Шилжилтийн насны олон өөрчлөлтийн үед хэт их өлсөх, хэт их идэхгүй байхыг хичээх хэрэгтэй. Гэхдээ манай улсад сургууль дээр хоол идэх боломж ихэнх сургуульд хомс байгаа нь хүүхдүүдийн эрүүл мэндэд сөрөг нөлөө үзүүлж байгаа. Дунд ангиас эхлэн дугуйлан, нэмэлт сургалтанд явах зэргээр гэртээ харих цаг оройтож байгаа. Холоос сургуульдаа явдаг бол замын түгжрээнээс хамаарч оройтно гэх мэт олон шалтгаан байгаа. Гэртээ эрт харьсан ч гэрт нь бэлэн хоол байхгүй айл ч олон байгаа. Иймээс гэр бүлийнхээ туслалцааг авч өглөөний цай, өдрийн хоолыг аль болох чанартай байлгахыг хичээвэл их тустай байх болно. Өдөр бүр сүү ууж, жимс идвэл хангалттай аминдэм, эрдэс бодис, чанартай уураг, өөх тос авна гэсэн үг. Тамхи татах, архи, пиво уух, чипс, бэлэн гоймон, шарсан хоол зэрэг эрүүл бус хүнс хоолыг хориглох хэрэгтэй.
-Өглөөний цайг заавал уухын чухал ач холбогдлын талаар зөвлөхгүй юу?
-Өглөөний цай нь унтаж амарсан бие махбодийг илчлэг, шим тэжээлийн бодисоор хангаж, амарсан эрхтэнийг ажиллагаанд оруулдаг хооллолт юм. Өглөөний цайг заавал ууж занших нь ирээдүйд эрүүл мэндэд тань маш ач тустай. Монголчууд өлөн элгээ заавал тайл гэж өглөөний цайны чухлыг тодотгосон байдаг бол англиар breakfast гэдэг нь -break, тасдах, эвдэх, хувиргах, fast-өлөн байх, өлсөх, мацаг барих гэсэн утгатай 2 үгнээс бүрдэх ба тухай өдрийн анхны хоол, шөнийн туршид хоолгүй байдлыг эвдэж буй хооллолт гэсэн утгаар нэрлэжээ. Тэгэхээр өлсөлтийг тайлах, хамгийн анхны зүйл чухал гэсэн утга байна.
Монголчуудын хувьд жилийн 4 улирал ээлжилдэг ард түмэн учраас зуны цагт хөнгөн байдлаар, өвлийн улиралд аль болох халуун зууш, халуун, дөнгөж бэлтгэсэн өглөөний цай уувал сайн. Өглөө бүр хүйтэн ус тийм ч оновчтой хэрэглээ биш бөгөөд хүн бүрт таарахгүй байх талтай. Тиймээс өсвөр насныхан өглөө бүр халуунаар бэлтгэсэн төрөл бүрийн халуун зууш, сүүтэй бэлтгэсэн төрөл бүрийн будааны чанамал, цөцгийн тостой талх гэх мэт олон төрлийн хоол идэж болно. Мөн буцалсан ус, хярам уух нь тустай. Өглөөний цай уухгүй олон жил үргэлжилбэл ид залуу насандаа цөс, нойр булчирхай, ходоод зэрэг хоол боловсруулах замын эрхтнээ өвчлүүлэх эрсдэл маш өндөр байх болно.
Эх сурвалж: Өсвөр насны охид: Тэд юуг мэдэхийг хүсдэг вэ? номоос
