Дорноговь аймгийн Сайншанд суманд 12 настай охин алга болж, эрэн хайх ажиллагаа гурав дахь өдрөө үргэлжилж байна. Охиныг эрэн хайх ажиллагааны талаар ямар мэдээлэл авч, хэрхэн ажиллаж буйг Дорноговь аймгаас сонгогдсон УИХ-ын гишүүн Б.Дэлгэрсайхан дараах мэдээллийг өглөө.
Тэрбээр “Тухайн өдрийн өглөө 07:00 цагт өнгөрч байхад гэрээсээ гараад, багш нь 10:00 цагийн орчимд хичээлдээ ирээгүй гэж ярьснаас хойш цагдаа эрэн хайж эхэлсэн. Энэ цагаас хойш байнга холбоотой байгаа. Сэжигтнийг өчигдөр бүрэнхий болж байхад Цогтцэций сумын гуанзнаас барьж авсан. Сэжигтэн нь газраа зааж өгнө гээд цагдаагийн бүрэлдэхүүнтэй явж байгаа.
Өнөөдөр өглөө би зардлыг нь төлөөд онцгой байдлаас нисдэг тэрэг гаргалаа. Онц хүнд гэмт хэрэгтэй тэмцэх бие бүрэлдэхүүнийг нэмэлт хүчээр гаргасан. Өөр яах билээ. Түргэн шийдэхийн тулд сэтгэлээсээ хандсан. Төсвийг нь шийднэ, цохуулна гэж цаг алдаж байхаар нисээд өгөөч, зардлыг нь гаргая гэсэн юм.
Би өөрөө хуульч хүн. Болдог бол ийм улсуудыг цаазаар авах ёстой гэж боддог. Арай дэндэж байна. Одоогийн сэжигтэн нь бага насны хүүхдийг хүчиндсэн хэргээр Авдрантын шоронд 12 жил суугаад гарсан хүн байна лээ” гэв.
