Зүрх судасны өвчний үед хэрэглэх 7 төрлийн эмийг ЭМД-ын сангаас 100 хувь хөнгөлөлттэй олгож байна
Новартис эмийн хүртээмжийг сайжруулах хөтөлбөрийн хүрээнд хүн амын дунд зонхилон тохиолддог, нас баралтын хувь өндөртэй өвчлөлийг үндсэн 4 бүлэгт хувааж, 15 ерөнхий нэршлийн 24 тун, хэмжээ бүхий эмийг ЭМД-ын сангийн 100 хувийн хөнгөлөлттэй үнээр олгож байна.
Эдгээр эмийг эхний ээлжинд “Новартис” компанийн албан ёсны 3 дистрибьютерийн 191 салбар эмийн сангаар олгож байсан бол эмийн хүртээмжийг нэмэгдүүлэх зорилгоор ЭМДЕГ-тай гэрээтэй бусад эмийн сангуудтай гэрээ байгуулан ажиллаж байна.
Энэ хүрээнд өнөөдрийн байдлаар хот, хөдөөгийн нийт 941 гаруй эмийн сангаар Новартис компанийн эмийг ЭМД-ын 100 хувийн хөнгөлөлттэй үнээр олгож байгааг ЭМДЕГ-аас мэдээлэв.
Түүнчлэн, ЭМДЕГ-ын тусламж үйлчилгээний багц хариуцсан ахлах мэргэжилтэн Ш.Сэлэнгэ “Эрүүл мэндийн даатгалын сангаас олголог хөнгөлөлттэй эмийн жагсаалт шинэчлэн батлагдаад есдүгээр сараас хэрэгжиж эхэлсэн.
Энэ жагсаалт нь хэд хэдэн онцлогтой. Тухайлбал 0-18 насны хүүхдийн уналт таталтын эсрэг эмийг даатгалын сангаас 100 хувь, насан хүрэгчдийн уналт, таталтын эмийг 70 хувь хөнгөлж байгаа.
Мөн ЭМДЕГ нь хүн амын дунд зонхилон толхилддог өвчин болох зүрх судас, чихрийн шижин, халдварт өвчний үеийн эм зүйн тусламж үйлчилгээг сайжруулах хүрээнд Швейцар улсын “Глобал Новартис” компанитай төсөл хэрэгжүүлэн ажиллаж байна. Төслийн хүрээнд иргэдийн дунд зонхилон тохиолддог халдварт болон халдварт бус өвчний ерөнхий нэршлээр 15, худалдааны нэршлээр 24 эмийг 100 хувь даатгалаар хөнгөлөхөөр болсон” гэдгийг хэлж байсан юм.