Даатгуулагч-иргэн та ЭМД-ын шимтгэлээ бүрэн төлснөөр эрт илрүүлэх, урьдчилан сэргийлэх үзлэгт үнэ төлбөргүй хамрагдах боломжтой. 46-60 насны багцад дараах үзлэг, оношилгоо багтах бөгөөд товлолын дагуу зөвхөн лавлагаа шатлалын ЭМБ-д хийлгэнэ хэмээн ЭМДЕГ-аас мэдээлэв.
Монгол Улсын Засгийн Газрын санаачилгаар 2022 оны тавдугаар сарын 1-нээс орон даяар эрт илрүүлэх үзлэг, шинжилгээг зохион байгуулж буй. Үүнд бүх насныхан хамрагдах бөгөөд 0-5 нас, 6-17, 18-30, 31-45, 46-60, 61-с дээш насны гэсэн ангилалтай.
ЭМЯ-ны Бодлого төлөвлөлтийн газрын Судалгаа төлөвлөлтийн хэлтсийн дарга, Анагаах ухааны доктор дэд профессор Э.Оюунсүрэн “Урьдчилан сэргийлэх үзлэг нийт хүн амыг хамарна. Тиймээс Өрх, сум, тосгоны буюу анхан шатны эрүүл мэндийн байгууллагад төвлөрч ажиллаж байгаа.
Үзлэгт хамрагдах иргэнд урилга очно. Зарим эрүүл мэндийн байгууллагууд цаасан хэлбэрээр урилга хүргүүлж байгаа бол зарим нь цахимаар, мессеж хэлбэрээр хүргүүлж байна. Эрүүл мэндийн даатгалын тухайн хууль, ЭМДҮЗ-ийн тогтоолд зааснаар бол төрсөн өдрөөс хойш гурван хоногийн дараа гэсэн хугацаа байдаг.
Энэ урьдчилан сэргийлэх үзлэгийн хувьд тухайн Эрүүл мэндийн байгууллага хугацааг товлож, урилга хүргүүлнэ. 0-5 насны бүлгийг хамруулж байхад төрсөн өдөр нь болох гэж байгаа юм байна гээд гэнэт өөр насны бүлгийн хүнийг хамруулах ажлыг зохион байгуулах боломжгүй. Тухайн эрүүл мэндийн байгууллага хүний нөөц, тоног төхөөрөмжөө хангаж үйл ажиллагааг удирдана.
2019 оноос хойш ЭМД-аа төлөөгүй бол нөхөн төлж байж үзлэгт хамрагдана. Энэ талаарх мэдээллийг иргэдэд дэлгэрэнгүй хүргүүлсэн. Урьдчилан сэргийлэх үзлэгт хамрагдахад дунджаар хоёр хоног зарцуулж байна. Тиймээс даатгалаа төлсөн байх, албан ёсоор ажлаасаа чөлөө авсан байх зэргээр хувийн бэлтгэлүүдээ сайтар хангасан байх шаардлагатай.
Эрт илрүүлэг нь онош тавиад эмчлэх биш харин эрсдлийг тодорхойлж, эрсдэлтэй бүлэгт багтсан бол дараагийн шатны тусламж, үйлчилгээнд шилжүүлэх юм” гэсэн юм.