Гурван гэм арвидсан шинж, түүнийг дараах идээ ундааны талаар мэдээлэл хүргэж байна.
Хий арвидахад:
Дулаан газар байхыг хүсэх
Бие чичрэх
Хэвлий хөөж, гэдэс дүүрэх
Их эвшээх
Өтгөн хатах
Үг яриа олшрох
Толгой эргэх
Биеийн тамир хүч буурах
Нойр муудаж өнгөц сэрэмтгий болох
Мэдрэхүйн эрхтнүүдийн үйл ажиллагаа буурах шинж илэрнэ.
Хийг дарах идээ ундаа
Адууны мах, тарваганы мах, борц, үрийн тос, хуучин шар тос, цагаан сармис, сонгино, сүү, бурам хэрэглэнэ.
Шар арвидахад:
Баас, шээсний өнгө шарлах
Нүд шарлах
Их өлсөх
Ам их цангах
Их халууцах
Нойр багасах
Гүйлгэж, суулгах шинж илэрнэ.
Шарыг дарах идээ ундаа:
Үнээ, ямааны тараг ба айраг, шинэ шар тос, гөрөөсний мах, ямааны мах, арвайн гурил, шингэн зутан, гашуун ногоо, хүйтэн ус, буцалгаж хөргөсөн ус зэргийг хэрэглнэ.
Бадган арвидахад:
Биеийн илч буурах
Хоолны шингээлт муудаж ходоодон дээр цанхайх
Бие хүнд оргих
Арьсны өнгө цайрах
Бие алжааж үе гишүүн сульдах
Шүлс элбэгших
Нойр их болох, алжааж нойрмоглох
Амьсгал амаргүй болох шинж илэрнэ.
Бадганыг дарах идээ ундаа
Хоньны мах, бух гөрөөсний мах, араатны мах, загасны мах, зөгийн бал, хуучин үрийн гурил, сарлагийн тараг ба айраг хэрэглэвэл зохимжтой.
Хавар цагт хэрхэн хооллох вэ?
Хаврын хавсаргыг даван туулахад хамгийн зохистой идээ, ундаа нь хүйтэн, халууныг тэнцүүлэх бүлээн чанартай идээ байх ёстой юм. Энэ үед шар идээг голчлон хэрэглэх улаан болон хар идээтэй хамт эсвэл дангаар хэрэглэнэ.
Шар идээ гэж малаас гарах сүү, сүүн бүтээгдэхүүнийг өнгөөр нь билэгдэн нэрлэдэг бөгөөд шар тос, цагаан тос, арвайн гурил болон шар будаатай цай, шар тостой цай, ээзгий, бяслаг, өрөм, зөөхий, уураг, хайлмаг зэрэг идээ, ундаанууд багтана. Шар идээ нь шингэц сайтай, ходоодны галын элчийг сэлбэж, илчийг үүсгэдэг учир хаврын улиралд нэн тохиромжтой юм.
Харин дөрөв болон тавдугаар сард амтлаг амттай, хөнгөн сэрүүн тослог идээг / бүх төрлийн цагаан идээ, уураг, тараг, сүү, ээдэм, ааруул, зөөхий, бяслаг/ гол болгож эсрэгээр давслаг, исгэлэн, гашуун амтыг тэвчих хэрэгтэй. Учир нь нэ үед хүнд хоол ундыг боловсруулах явц удааширдаг байна.
