Үндэсний их баяр наадмын өдрүүдэд эрүүл мэндийн байгууллага хэрхэн ажиллах талаар болон гэдэсний халдварт өвчин, хоол хүнсний аюулгүй байдал, осол гэмтлээс урьдчилан сэргийлэх зөвлөмжийг ЭМЯ-наас хүргэлээ.
Энэ үеэр ЭМЯ-ны Нийгмийн эрүүл мэндийн газрын дарга Д.Баярболд сүүлийн таван жилийн осол гэмтлийн тоог танилцуулаад, осол гэмтлийн шалтгаан нь хамгаалалтын бүсээ зүүгээгүй, хурд хэтрүүлсэн, согтуугаар авто машин жолоодсон замын тэмдэг, тэмдэглэгээ хангалтгүй, эцэг эх асран хамгаалагчийн хараа хяналт сул байгаатай үүсэж байна гэдгийг хэллээ.
Мөн тэрбээр “Баяр наадмын амралт эхэлж байгаатай холбогдуулан ЭМЯ-ны зүгээс эмнэлгийн байгууллагуудын бэлэн байдлыг хангуулж байна. Гэхдээ манай иргэдийн анхаарал бас чухал юм.
Мөн Зам тээврийн яамнаас осол гардаг хар цэгүүдийг бүртгэсэн. Хар цэгүүдэд зураг тавин, тэмдэглэгээ хийж байгаа. Хаана хар цэг байгааг иргэд Нийгмийн эрүүл мэндийн үндэсний төвийн сайтруу ороод харах боломжтой. Түүнчлэн ЭМЯ болон ГССҮТ хамтран аялал жуулчлалын гол цэгүүдэд ГССҮТ-ийн эмч нарын багийг ажиллуулж байгаа.
Мөн аялал хийж байгаа үедээ хоол хүнсний сонголтод онцгой анхаараарай гэж ХӨСҮТ, МХЕГ-аас сануулж байна. Ялангуяа гадаад орчны температур их байгаа энэ үед түргэн муудах бүтээгдэхүүн машиндаа олон хоног авч явж хэрэглэснээр хоолны хордлогод өртөх эрсдэлийг бий болгодог. Тиймээс үүнийг анхааруулж байна.
Мөн хоол хүнсний зохисгүй хэрэглээтэй холбоотойгоор ходоод гэдэсний хямрал, нойр булчирхайн үрэвсэл баяр наадмын өдрүүдэд нэмэгддэг. Ялангуяа айраг, хорхог архины хэрэглээ нь ходоод гэдэсний хямрал, нойр булчирхайн үрэвслийг үүсгэх гол нөхцөл болдог” гэв.
