ТТАХНЭ-ийн дотрын II тасгийн эмч Б.Буд улаан хоолойн сөөргөө өвчний талаар зөвлөгөө өгснийг сийрүүлэн хүргэж байна.
Ходоод, улаан хоолойн сөргөө гэж ямар өвчнийг хэлэх вэ. Юунаас болж үүсдэг, илрэх шинж тэмдэг нь юу вэ?
Улаан хоолойн доод хуниасны булчин суларснаас ходоод, дээд гэдэсний агуулагдахуун улаан хоолойд сөргөн орж, улаан хоолойн сөргөөг үүсгэдэг. Энэ нь архаг, дахилтат явцтай өвчин юм.
Улаан хоолойн сөөргөө үүсэхэд архи, тамхины хэрэглээ, таргалалт, хооллолтын буруу хэв маяг нөлөөтэй гэж үздэг. Таргалалтын улмаас хэвлийн хөндийн дотоод даралт ихсэж, улмаар улаан хоолойн хунигч булчинд нөлөөлснөөр сөөргөө өвчин үүсдэг. Мөн өрцний ивэрхий, эм, бусад архаг өвчин ч нөлөөлдөг.
Улаан хоолойн сөөргөө өвчний үед цээж хорсох, гулгих, шүлс их ялгарах, ам гашуу оргих шинж илэрнэ. Мөн хоолой сөөх, хуурай хий ханиалгах, аюулхайд хөндүүрлэх зэрэг зовиур ч илрэх нь бий.
Энэ өвчин нь амьдралын чанарт мөн нөлөөлдөг. Тухайлбал зарим хүний цээж шөнө хорсож сэрснээс нойргүйдэлд хүрч байна.
Энэ өвчин хүндэрвэл ямар эрсдэлтэй вэ?
Улаан хоолойн сөөргөө хүндэрвэл хавдрын урьдал өвчин, хавдарт хүргэх эрсдэлтэй. Тиймээс эмчид хандаж улаан хоолой, ходоодны дурангийн шинжилгээ хийлгэх хэрэгтэй.
Энэ өвчнөөс урьдчилан сэргийлэхийн тулд ойр ойрхон бага идэх хэрэгтэй бөгөөд нэг дор их идэж, хэт цадаж болохгүй. Хэрэв хэвлийн таргалалттай бол үүний эсрэг арга хэмжээ авна.
Нэгэнт сөөргөө өвчтэй гэдэг нь оношлогдсон бол өндөр дэртэй унтана. Мөн чанга бүс зүүхгүй. Бүсгүйчүүд маань корсет зүүж дасгал хийдэг. Энэ нь хэвлийн хөндийн дотоод даралтыг үүсгэх нэг шалтгаан болдог.
Хооллолтын хувьд хийжүүлсэн ундаа, давс ихтэй хүнсний бүтээгдэхүүн, цитрус жимс хэрэглэхгүй. Мөн архи, тамхи нь улаан хоолойн хунигч булчинг сулруулдаг тул анхаарах хэрэгтэй. Түүнчлэн энэ өвчинд стресс нөлөөлдөг учраас зөв аргаар тайлж сураарай.