Нийгмийн эрүүл мэндийн үндэсний төвөс сарын тэмдгийн үед илрэх шинж тэмдгүүд болон өвдөлт намдаах аргуудын талаарх зөвлөмжийг хүргэжээ.
Сарын тэмдгийн үед ямар шинж илрэх нь хэвийн бэ?
– Хоолны дуршил өөрчлөгдөх
– Сэтгэл санаа хямрах
– Юманд төвөгшөөх
– Хэвлий хэсгээр өвдөх
– Толгой бага зэрэг өвдөх
– Батга ихсэх
– Хөх хөндүүрлэх
– Нойр хүрэхгүй байх
– Огиулах гэх мэт.
Сарын тэмдэг өвдөлттэй ирэх үед өвдөлтийг намдааж болох аргууд:
– Шингэц сайтай, илчлэг өндөртэй хоол идэх
– Давсны хэрэглээг хязгаарлах
– Шингэн хангалттай хэрэглэх, ус өдөрт 1.5-2 литрээс доошгүй уух
– Ууц нуруун дээрээ, эсвэл хэвлийн доод талд, аль өвдөж байгаа хэсэгтээ бүлээн жин тавих, бүлээн шүршүүрт орох
– Өвдөг, тохой дээр тулж хэвтэх
– Дээшээ харж хэвтэн өвдгөө нугалан тойргоор эргүүлэх
– Явган явах хөнгөн дасгал, хөдөлгөөн хийх
– Өвчин намдаах эм уух
Эдгээр аргуудад үр дүнгүй, өвдөлт ихтэй, дээрх зовууриуд хүчтэй илэрч байвал эмэгтэйчүүдийн нарийн мэргэжлийн эмчид үзүүлж зөвлөгөө авах хэрэгтэй.
Өсвөр насны охидод өгөх зөвлөгөө:
Охид сарын тэмдэг алдагдсаны улмаас цус багадалтын хөнгөн, дунд, хүнд хэлбэрт орох, зовиур илрээд байхад хүндэрсэн хойно эмчид хандах тохиолдол гардаг гэдгийг мэргэжилтнүүд хэлдэг.
Хэвийн сарын тэмдэг гэдэг нь 7 хоног үргэлжлэх бөгөөд өсвөр насныханд 21-45 хоногийн мөчлөгтэй байна. Биений юм ирсэн өдрөөс дараагийн биений юм ирсэн эхний өдөр хүртэлх хугацааг биений юмны мөчлөг гэнэ.
7 хоногоос дээш үргэлжлэх, 21 хоногоос өмнө, 45 хоногоос хойш мөчлөгтэй ирж байвал шаардлагатай тохиолдолд эмчид хандах хэрэгтэй.