Бага насны хүүхдүүдийн дунд менингококкт халдвар бүртгэгдэж байгаа тухай Эрүүл мэндийн яамнаас мэдээлсэн билээ. Тэгвэл уг халдварын талаарх мэдээллийг ХӨСҮТ-ийн яаралтай тусламжийн тасгийн эмч Т.Мөнхзул өглөө.
– Менингококкт халдвар гэж юу вэ?
– Менингококкт халдвар нь ерөнхий хордлогын шинжээр илрээд, арьсанд өвөрмөц тууралт өгдөг нянгийн гаралтай амьсгалын замын хурц халдварт өвчин юм. Менингококкт халдвараар өвдсөн, хамар залгиурын үрэвсэлтэй эсвэл нян тээгчид уг халдварыг дамжуулдаг. Энэ халдвараар ихэвчлэн 5-аас доош насныхан өвддөг. Нууц хугацаа богинотой бөгөөд хэдхэн цагаас эхлээд 20 хоног үргэлжилж болно. Дундаж нууц хугацаа нь 6-7 хоног байдаг.
– Менингококкт халдвар авсан үед ямар шинж илрэх вэ?
– Менингококкт халдвар авсан тохиолдолд шалтгаан тодорхойгүйгээр 38- 42 хэм хүртэл өндөр халуурдаг. Ихэвчлэн хүүхэд өвддөг учраас хоолонд дургүй болж, дотор нь муухайрдаг. Мөн хүүхэд их унжгар, ноомой болно. Эсвэл хэт мэдрэмтгий, цочромтгой болох нь бий. Түүнчлэн арьс нь цонхийж цайх шинж тэмдгүүд давамгай илэрнэ. Ингээд 1-2 хоногийн дараагаас цусархаг тууралт гардаг. Хүнд явцтай үед 12 цагийн дотор цусархаг тууралт хөл, гуянаас эхэлж гарна.
– Нэн хүнд хэлбэрийн үед ямар шинж тэмдэг гарах вэ. Энэ өвчний үед юу анхаарах вэ?
– Нэн хүнд хэлбэрийн үед 4-6 цагийн дотор хөл, гуя, нуруу, цээж, нүүрээр цусархаг тууралт гарч, богино хугацаанд халдвар хордлогын шокоор хүндэрдэг аюултай өвчин юм. Хэрэв шалтгаан нь тодорхойгүй өндөр халуурч байгаа бага насны хүүхэд байвал яаралтай харьяа дүүрэг, өрхийн эмчдээ хандах хэрэгтэй. Ер нь менингококкт халдварын үе тохиож байгаа учраас өрх, дүүргийн эмч нар хүүхэд үзэхдээ хянамгай байх ёстой. Нэгэнт менингококкт халдвараар өвдсөн бол эмнэлгийн байгууллагад хандаж, эмчилгээ заавал хийлгэнэ. Бүрэн эдгэсэн тохиолдолд халдвартын хүүхдийн эмчийн ханалтад гаргадаг. Түүнчлэн халдвар авсан хүүхдийн ар гэрийнхэнд антибиотик эмчилгээ хийж, вакцинжуулах ажлыг ХӨСҮТ хийдэг.
