Даваа гарагт Беларусийн хилийн бүс нутагт зохион байгуулагдсан Украин-Оросын засгийн газрын яриа хэлэлцээ таван цаг орчим үргэлжлээд завсарлажээ.
Уулзалтын үеэр талууд зарим асуудлаар санал нэгдэж, төлөөлөгчид тус тусын засгийн газартайгаа зөвлөлдөхөөр буцацгаасан тухай албаны эх сурвалж мэдээлсэн байна. Харин дараагийн ээлжийн хэлэлцээ ойрын өдрүүдэд Беларусь-Польшийн хилийн орчим зохион байгуулагдах болсон ажээ.
Түүнчлэн Украины Ерөнхийлөгч В.Зеленский Оросын төлөөлөгчидтэй таван цаг үргэлжилсэн хэлэлцээний үр дүнд дүн шинжилгээ хийж байна гэж мэдэгдлээ.
Тэрбээр “Хэлэлцээ хийх үед нэг тал нөгөө талдаа их буугаар пуужингийн цохилт өгөхгүй бол шударга хэлэлцээ байж болно. Одоогоор бидний хүсэн хүлээсэн үр дүнд хүрээгүй байна” гэдгийг мөн онцолжээ.