Цаас болон и-баримтын хаягдлыг дахин боловсруулах, бордоонд ашиглах технологи манай улсад нэвтрээд байгаа билээ.
Говьд ногоон бүс байгуулж, сэргээгдэх эрчим хүч, ухаалаг хүнс, хөдөө аж ахуй, аялал жуулчлалд суурилсан эдийн засагтай инженерийн суурин байгуулах “Шамбала 2056” төсөл хэрэгжиж байгаа бөгөөд тус төслийн багийнхан хог хаягдал болж буй И-баримтуудыг нэгдсэн байдлаар цуглуулж, бордоо болгон ашиглахаар болжээ.
Цуглуулсан баримтуудыг ирэх сарын эхээр төслийн талбай руу тээвэрлэж, тарьсан мод болон хавар тарих модны бордоо болгон ашиглах юм байна.
Иргэд өөрт хэрэгцээгүй баримтуудаа “Blue Sky Tower”-ын баруун талд байрлах “Jack’s Coffee” салбар болох “Nitro B” дээр даваа-баасан гарагт 09:00-23:00, бямба, нямд 09:00-21:00 цагийн хооронд хүргэж өгөх боломжтой. Баримтын хаягдлыг гуравдугаар сарын 1-нийг хүртэл хүлээж авах бөгөөд холын замд тээвэрлэлтийн явцад задрахаас сэргийлж, сайтар боож, баглахыг сануулжээ.
Мөн тус төслийнхний зүгээс И-баримтын цаасыг бордоо болгон гэртээ ашиглах хүсэлтэй хүмүүст аргыг нь зааж өгөх боломжтой талаар мэдээлжээ.