МАН-ын бүлгийн ээлжит хуралдаан боллоо. Хуралдаанаар ковидын нэг удаагийн хууль буюу “Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах талаар чиглэл өгөх тухай” хуулийн хэрэгжих хугацааг дахин сунгах асуудлыг хэлэлцэж, саналаа нэгтгэжээ.
МАН-ын бүлгийн дарга Д.Тогтохсүрэн: Ковид-19 цар тахлын тухай хууль үйлчилж байгаа. Үүнийг өмнө нь хоёр ч удаа сунгасан. Энэ хуулийг зургаан сарын хугацаагаар сунгах нь зүйтэй гэсэн шийдвэрийг намын бүлгээс гаргалаа. Зургаан сараас цааш хугацаагаар сунгах тухай асуудал ярихгүй гэж үзэж байна.
Дэлхий нийтэд цар тахал үргэлжилсээр, шинэ вирусын нөлөөгөөр зарим газруудад аюултай түвшин үүсч болзошгүй байна. Мөн манай экспорт, хил гааль хаагдсан байгаа. Тиймээс цаашид эдийн засагт хүндрэл үүсч болзошгүй байна. Энэ хоёр үндэслэлээр хуулийн үйлчлэх хугацааг сунгах асуудлыг зарчмын хувьд дэмжсэн. Засгийн газраар хэлэлцээд УИХ-д өргөн барьснаар энэ ондоо багтааж хэлэлцэн батална.
Ковидын хуульд олон чухал заалт бий. Энэ хууль батлагдаагүй байсан бол энэ хэмжээнд цар тахлыг давж гарахгүй байсан.
Цахилгаан дулааны хөнгөлөлтийг улсын төсвөөс биш Эрдэнэт үйлдвэрээс шийдэж байсан. Улсын төсөвт энэ шийдвэр тусгагдаагүй учраас нэгдүгээр сарын 1-ээс хувь хүн, ААН өөрсдөө төлдөг хуучин хэлбэртээ шилжээд явна.
Ковидын хуульд иргэдэд чиглэсэн олон заалт бий. Засгийн газар тухайн үедээ нөхцөл байдлаасаа шалтгаалан хэрэгжүүлнэ. Энэ хуульд ипотекийн зээлтэй холбоотой заалт бий. Зээл төлөлтийг хойшлуулах зэрэг заалтууд хэвээрээ байгаа учраас давхар сунгагдаад явна.
