Нийслэлийн Эрүүл мэндийн газрын уламжлалт анагаах ухаан, сэргээн засах, хөгжлийн бэрхшээлтэй иргэдийн асуудал хариуцсан мэргэжилтэн Д.Цэнджав дараах мэдээллийг өглөө.
Тэрбээр “Халдвараар өвдсөний дараа хүмүүсийн эмнэл зүйн байдлыг хоёр янзаар эрэмбэлж байгаа.
Нэн хүнд, хүнд өвдсөн буюу сэхээний, эрчимт эмчилгээний тасагт, амьсгалын апаратанд байсан хүн эмнэлгээс гараад эмчилгээгээ яаж үргэлжлүүлэх вэ гэвэл тухайн төв болон төрөлжсөн эмнэлэг, нэгдсэн эмнэлгийн сэргээн засах эмчилгээний тасагт мэргэжлийн эмчийн хяналт дор сэргээн засах эмчилгээгээ заавал эмнэлэгээр үргэлжлүүлэн хийх ёстой. Ийм хүмүүст сэргээн засах тусламж үйлчилгээ үзүүлэхдээ ачаалалд нь тохирсон дасгал хөдөлгөөнийг зөв зохистой хийлгэх хэрэгтэй. Учир нь эрчимт эмчилгээний тасгаас гарсан хүмүүс жоохон ачааллаад л ядраад байна гэдэг зовиур хэлж байгаа.
Харин хөнгөн, хүндэвтэр байдлаар өвдсөн буюу уушгины хатгаа болж хүндрээгүй хүмүүс сэргээн засах эмчилгээгээг заавал эмнэлгийн байгууллагад үйлчлүүлэн хийлгэх шаардлагагүй. Үүний оронд гэр бүл, хамт олонд түшиглэсэн эмчилгээг хийх хэрэгтэй гэж дэлхий нийт үзэж байна. Өөрөөр хэлбэл зайнаас буюу телемедициний аргаар хүмүүсийг эмчлэх арга зүйд сургах аргыг баримталж байгаа.
Сэргээн засах тусламж үйлчилгээ үзүүлэх зааврыг ЭМЯ удахгүй батална. Энэхүү заавар нь дэлхий нийтэд судлагдаад түр гарч, шинэчлэгдээд явж байгаа. Иймд КОВИД-19-ийн дараа удаан үргэлжилж байгаа хам шинжүүдийг мэргэжлийн эмч, байгууллагын үгийг дагаж, зөв сэргээгээрэй” гэв.
