ЭХЭМҮТ-ийн гүйцэтгэх захирал Ш.Энхтөр “АСА станц”-д дараах мэдээллийг өглөө.
Тэрбээр, “ЭХЭМҮТ-д ковидийн дөрвөн тасагт 83 орыг дэлгэсэн ч өнөөдрийн байдлаар 147 өвтөн эмчлэгдэж байна. Тэдний 99 нь хүүхэд байна. Уламжлалт ойлголтоор 3-5 насны хүүхэд ханиад томуу зэрэг өвчлөлд өртөмтгий гэж үздэг байсан бол одоо хүүхдийн өвчлөлийн бүтэц тэс өөр болсон. Хүүхэд зүрхний шигдээс, бодисын солилцооны эмгэг, хавдар, архаг өвчин гэх мэт насанд хүрэгчдэд тохиолддог бүхий л өвчнөөр өвчилж байна.
Коронавирусийн халдвар архаг суурь өвчтэй хүмүүст илүү хүндээр тусч байгаа. Тэгэхээр хүүхдүүдийн нэлээдгүй хувьд архаг өвчин оношлогдож, хяналтанд байдаг болсон учраас тэднийг хамгаалахын тулд заавал дархлаажуулалтад хамруулах нь зүйтэй. Тиймээс дэлхий нийтэд судалгааны ажил өрнөж байна.
Дэлхийн өндөр хөгжилтэй орнууд 12-оос дээш насны хүүхдийг вакцинжуулаад эхэлчихлээ. 5-11 насны хүүхдэд хийх вакцины туршилт эхэлчихлээ. Есдүгээр сард урьдчилсан үр дүн нь гарах юм байна. Урьдчилсан байдлаар 11 сар гэхэд хүүхдийн бүх насанд вакцинжуулалт хийх дүрэм журам, вакцин батлагдан гарах тооцоо бий. Манай улс эдгээрийг дагаад явж байгаа учраас өвөлдөө хүүхдийн бүх насны вакцинжуулалт хийгдэх болов уу гэсэн хүлээлттэй байна.
Жирэмсэн хүний хэвлийн хөндийд ачаалал, даралт нэмэгдэх тул жирэмсний сүүлийн саруудад амьсгал давхцах, ядрах, толгой эргэх, цус багадалт үүсэх зэрэг шинж тэмдэгүүд илэрдэг. Коронавирус уушгийг гэмтээдэг. Цусны хялгасан судас, амьсгалын замын төгсгөл хэсэг хооронд хийн солилцоо явагдах бүсийг гэмтээснээр богино хугацаанд амьсгалын дутагдалд орно. Жирэмсэн эмэгтэйчүүд халдвар авсан тохиолдолд богино хугацаанд хүндэрч байгаа учраас хөнгөн хэлбэрийн өвчилсөн тохиолдолд ажиглах байруудыг гаргасан” гэлээ.
