“Аугаа зуун” киногоор олонд танигдсан үзэсгэлэнт жүжигчин Сельма Эргечийн тухай мэдээллийг хүргэж байна.
Сельма Эргеч 1978 оны 11-р сарын 1-нд Германы Хамм хотод төрсөн. Сельмагийн аав нь Турк, ээж нь Герман гаралтай бөгөөд тэд хоёул эмч мэргэжилтэй. Охиныг 5 настай байхад гэр бүл нь Германаас Туркэд нүүн иржээ. Тэд Туркийн Мерсин хэмээх жижиг хотод суурьшиж, хэсэг хугацааны дараа Анкара руу нүүв. Гэвч тэд 1989 онд Герман руу эргэн очжээ.
Эргеч ойр ойрхон нүүдгээс нь болж дотны найзгүй, дотогшоо, дуу цөөтэй хүүхэд болж өссөн байна. Мөн тэрээр 9 настайдаа охин цагаан хоолтон болжээ.
Сельма сайн сурагч байсан бөгөөд эцэг эх нь ч боловсролд нь их анхаардаг байв. Тэрээр Westfalia Wilhem их сургуульд анагаах ухааны чиглэлээр 3 жил, Fern Universität Hagen-д сэтгэл судлал, гүн ухааны чиглэлээр мөн суралцжээ.
Тэрээр 2000 оноос хойш загвар өмсөж эхэлсэн бөгөөд анхлан NBC студийн “Yarım Elma” хэмээх телевизийн цувралд тоглож байжээ. Сельма зураг авалтанд орохын тулд жилийн турш эмчийн ажлаасаа завсарлага авсан байна. Түүнд кино урлаг маш их таалагдаж энэ чиглэлээр ажиллахаар шийджээ. Харин түүний ээж, аав энэ саналыг нь тийм ч таатай хүлээж аваагүй гэдэг.
Сельма Эргеч Муждат Гезены нэрэмжит Урлагийн төвийн жүжигчний ангид элсэн орж, Туркийн жүжигчин Алие Узунатаганаар хичээл заалгажээ. Харин залуу жүжигчнийг олонд таниулсан анхны кино нь 2006 онд гарсан “The Net 2.0” юм. Үүнээс хойш түүнд олон киноны гол дүрд тоглох санал ирсэн гэдэг.
Мэдээж түүнийг олон оронд алдаршуулсан кино бол бидний сайн мэдэх “Аугаа зуун”. Султан Сулейманы дүү Хадижегийн дүр түүнд хамгийн их алдар нэрийг авчирсан. Турк улс буюу эртний Османы эзэнт гүрний түүхэн кино манай үзэгчдийн сонирхлыг ихээхэн татсан билээ.
Харин жүжигчин бүсгүй хувийн амьдралынхаа талаар олон нийтэд нээлттэй яриад байдаггүй. Тэрээр өмнө нь Туркийн жүжигчин Озгюр Чевиктэй хэсэг хугацаанд болзож байжээ.
Эргечийг түүнээс салсныхаа дараа Туркийн жүжигчин Угур Полаттай болзсон гэх мэдээлэл ч мөн байдаг. Тэд “Sis ve Gece” киноны зураг авалтын үеэр танилцажээ.
2013 оны өвөл Селмаг Окан Ялабыктай харилцаатай гэх мэдээлэл гарсан байна. Уг цуу яриа нь “Аугаа зуун” цувралаас үүдэлтэй. Учир нь тэд кинонд эхнэр, нөхрийг дүрийг бүтээдэг билээ. Гэхдээ хоёр жүжигчин хоёул цуурхлыг няцаасан байдаг.
Харин тэрээр 2015 онд Туркийн зохиолч Эрдал Озын хүү Жан Озтой гэрлэжээ. Тэд хоёр жил үерхсэний эцэст гэрлэж 2016 онд охинтой болсон байна. Залуу хосуудын хуримын ёслол Германы Готтмадинген хотод болжээ.