Нийгмийн ур чадвар нь хүүхдүүдийн харилцааг сайжруулах боломжийг олгодог. Нийгмийн ур чадвар сайтай хүүхдүүд бусдаас илүү үр бүтээлтэй байдаг. Жишээлбэл, нэг судалгаагаар өдөр өнжүүлэх орчинд ихэнх цагаа өнгөрүүлдэг хүүхдүүдийн стрессийн түвшин бага байгааг тогтоожээ.
Нийгмийн ур чадвар гэдэг нь таны хүүхдүүд өсч томрох тусам байнга сайжруулж байх шаардлагатай цогц зүйл юм. Эдгээр нь хүчин чармайлт, дадлагын үр дүндбий болно.Хүүхдүүддээ илүү сайн зүйл хийхэд нь тусалж болох зүйлийгг хайж олоорой.
Ашиг тус
Нийгмийн ур чадвар нь хүүхдүүдэд олон төрлийн ашиг тус өгдөг. Тэд сургуульдаа илүү их амжилтанд хүрч, үе тэнгийнхэнтэйгээ илүү сайн харилцаатай болдог.
Боловсрол, ажил мэргэжлийн үр дүнгүүд илүү сайн байна: Пенн Стейт, Дьюкийн их сургуулийн судлаачид таван настай байхдаа бусадтай хуваалцах, сонсох, хамтран ажиллах, дүрмийг дагаж мөрдөх чадвар сайтай хүүхдүүд коллежид элсэх магадлал өндөр байгааг тогтоожээ. Тэд мөн 25 насандаа бүтэн цагаар ажиллах чадвартай байв.
Амжилтанд хүрэх: Нийгмийн сайн ур чадвар нь хүүхдүүдийг ирээдүйгээ гэрэлтүүлэхэд тусалдаг. Америкийн Нийгмийн эрүүл мэндийн сэтгүүлд хэвлэгдсэн судалгаанаас харахад хүүхдийн цэцэрлэг, цэцэрлэг дэх нийгмийн болон сэтгэл хөдлөлийн чадвар нь насанд хүрээд амжилтанд хүрэхэд хамгийн том нөлөө болдог гэжээ.
Илүү сайн нөхөрлөл: Нийгмийн харилцааны өндөр чадвартай, үе тэнгийнхэнтэйгээ сайн ойлголцож чаддаг хүүхдүүд амархан найз нөхөд болдог. Олон улсын нийгэм, зан үйлийн шинжлэх ухааны нэвтэрхий толь бичигт хэвлэгдсэн судалгаагаар бага насны нөхөрлөл нь хүүхдийн сэтгэцийн эрүүл мэндэд тустай болохыг харуулж байна.
Нөхөрлөл нь хүүхдүүдэд асуудал, зөрчил мөргөлдөөнийг шийдвэрлэх гэх мэт илүү дэвшилтэт нийгмийн ур чадвар эзэмшүүлэх боломжийг олгодог. Хүүхдүүдийн эзэмших ёстой 7 чадварыг дор дурдлаа.
Хуваалцах
Идэх зүйлс эсвэл тоглоомоо хуваалцаж сурах нь хүүхдүүдэд найз нөхөд болоход нь тусалдаг. Сэтгэл судлалын шинжлэх ухааны судалгаагаар хоёр настай хүүхдүүдэд бусадтай хуваалцах хүсэл эрмэлзэл илэрдэг гэжээ. Гэхдээ ихэвчлэн тэд өөрт илүү байгаа үедээ л бусдад өгдөг байна.
Харин 3-6 настай хүүхдүүд үнэтэй зүйлийг хуваалцахдаа дургүй байдаг. Хүүхдүүд жигнэмэгнийхээ талыг найзтайгаа хуваалцах дургүй байж магадгүй. Гэхдээ долоо эсвэл найман насандаа хүүхдүүд шударга байдлыг илүү их анхаарч, бусадтай хуваалцах хүсэл эрмэлзэлтэй болдог. Хүүхдэд бусадтай хуваалцахыг заах нь тэдний өөрийгөө үнэлэх үнэлэмжийг дээшлүүлэхэд тусалдаг.
Хамтран ажиллах
Хамтарна гэдэг нь нэг зорилгод хүрэхийн тулд багаар ажиллахыг хэлнэ. Бусадтай хамтран ажилладаг хүүхдүүд бусдын хүсэлд хүндэтгэлтэй ханддаг. Тэд бас хувь нэмэр оруулж, оролцож, тусалдаг.
Хамтын ажиллагааны ур чадвар нь бусадтай ойлголцоход зайлшгүй шаардлагатай. Таны хүүхэд тоглоомын талбай дээр төдийгүй анги хамт олонтойгоо хамтран ажиллах шаардлагатай болно.
Насанд хүрсэн хүнд ч хамтын ажиллагаа чухал байдаг. Ихэнх ажлын орчин нь багаар хамтран ажиллах чадварыг хөгжүүлдэг шүү дээ. Хайр дурлалын харилцаанд ч хамтын ажиллагаа чухал үүрэг гүйцэтгэдэг.
Ойролцоогоор 3-4 настай, бага насны хүүхдүүд үе тэнгийнхэнтэйгээ нэг зүйлийн төлөө ажиллаж эхлэх боломжтой. Хүүхдүүдийн хувьд хамтын ажиллагаа нь тоглоомоор цамхаг босгох зэрэг хүн бүрийн оролцоо шаарддаг зүйлээс эхэлнэ.
Сонсох
Сонсох нь зөвхөн чимээгүй байна гэсэн үг биш – энэ нь хэн нэгний хэлсэн зүйлийг үнэхээр өөртөө тусгаж, бодно гэсэн үг. Сонсох нь эрүүл харилцааны чухал бүрэлдэхүүн хэсэг. Эцсийн эцэст, сургуульд сурна гэдэг нь багшийн хэлсэн зүйлийг сонсохоос л хамаарна.
Хэлсэн зүйлийг шингээж авах, тэмдэглэл хөтлөх, эргэцүүлэн бодох нь таны хүүхдэд анги дэвших тусам улам чухал зүйл болно. Хүүхдэдээ сонсох дасгал хийлгэснээр өөрт боломжийг олгох чадварыг бэхжүүлнэ.
Таны хүүхэд өөрийгөө хэн болох, сайн хамтрагч, найз нөхдөө хэрхэн сонсохоо мэдэж өсөх нь чухал юм. Энэ чадвар нь дижитал төхөөрөмжийн эрин үед эзэмших ёстой хэцүү ур чадвар байж болно. Учир нь маш олон хүмүүс харилцан яриа өрнүүлж байхдаа ухаалаг гар утсаа ширтэх хандлагатай байдаг.
Зааврыг дагаж мөрддөг байх
Зааврыг дагаж мөрддөггүй хүүхдүүд янз бүрийн үр дагаварт хүргэх магадлалтай. Гэрийн даалгавраа хийхгүй, ёс зүйгүй байдлаас болж асуудал гардаг.
Хүүхдэд даалгаварыг хий гэж шаардхаас өмнө зөвлөгөө өгөх чадвартай байх нь чухал юм. Бид зарим алдаанаас зайлсхийх хэрэгтэй :
Бага насны хүүхдэд нэгээс илүү чиглэл өгч болохгүй. “Гутлаа тайл, номоо тавиад гараа угаа” гэж хэлэхийн оронд зөвхөн эхний үйлдлээ л хэл. Нэг дэх үйлдэл бүрэн хийгдсэний дараа дараагийн заавраа өг.
Өөрийнхөө шаардлагыг асуулт болгож битгий хэлээрэй. Жишээлбэл бид “Тоглоомуудаа одоо хураах уу?” гэж асуудаг. Энэ нь таны хүүхдүүдэд үгүй гэж хэлэх сонголт байгаа гэсэн үг юм. Мөн хүүхдүүддээ заавар зөвлөгөө өгсний дараа хэлсэн үгээ давтаж хэлэхийг тэднээс хүс. “Чи одоо юу хийх ёстой вэ?” гэж асуугаарай.
Алдаа бол ердийн зүйл гэдгийг битгий мартаарай. Бага насны хүүхдүүд анхаарлаа сарниулах, хийх ёстой зүйлээ мартах нь хэвийн үзэгдэл юм. Алдаа тус бүрийг чадвараа дээшлүүлэхэд нь туслах боломж гэж үзээрэй.
Хувийн орон зайг хүндэтгэх
Зарим хүүхдүүд ойр дотны хүмүүс, танилынхаа дэргэд дураараа аашилдаг. Тэд нөгөө хүнд таагүй мэдрэмж төрдөг гэсэн ойлголтгүй явдаг. Хүүхдүүдэд бусдын хувийн орон зайг хэрхэн хүндэтгэхийг зааж сургах нь чухал юм.
Хүүхдүүд бусдын хувийн орон зайг хүндэтгэхийг уриалсан өрхийн дүрмийг бий болгоорой. “Хаалга тогших”, “Зөвшөөрөл авах” гэх мэт цөөн хэдэн жишээ байна. Хэрэв таны хүүхэд танилынхаа биед зөвшөөрөлгүй хүрэх, ярьж байхад нь яриаг нь таслах юм бол тэр дор нь ойлгуулах хэрэгтэй.
Нүдрүү нь харж ярих
Нүдрүү нь харж ярих нь харилцааны чухал хэсэг юм. Зарим хүүхдүүд ярьж байгаа хүн рүүгээ хардаггүй. Хүүхэд тань ичимхий юу? Эсвэл дургүйцлээ илэрхийлэхдээ шал ширтдэг үү?. Үүнээс үл хамааран харилцаж байгаа хүнийхээ нүд рүү нь харж ярих нь чухал гэдгийг онцол.
Ёс зүйтэй байх
Баярласан сэтгэл, талархлаа илэрхийлж сурах нь хүүхдийн эзэмших ёстой нэг чадвар юм. Багш нар, бусад эцэг эхчүүд болон бусад хүүхдүүд зөв хүмүүжилтэй хүүхдийг хүндэтгэх болно. Хүүхдүүд хэрхэн эелдэг, хүндэтгэлтэй байхыг мэддэг байх нь чухал. Ялангуяа бусад хүмүүсийн гэрт эсвэл сургууль дээрээ байхдаа.
