Төгс эцэг эх гэж байдаггүй. Хүн бүр алдаа гаргадаг бөгөөд таны хийсэн буруу зүйл өөрт төдийгүй хүүхдэд суралцах боломж олгодог. Эцэг эх байхад тэвчээр, туршлага шаардана. Эцэг эхчүүд бид ямар алдаа гаргадаг вэ?
Муу зан авирт нь анхаарлаа хандуулдаг
Гинших, орилох, хараалын үг хэлэхийг үл тоомсорлох нь хэцүү байдаг. Хүүхдүүд биеэ зөв авч явахын тулд маш их эерэг анхаарал шаарддаг. Чимээгүй тоглох, тайван суух гэх мэт сайхан зан чанаруудыг бид ихэвчлэн анзаарагддаггүй. Тиймээс хүүхэд илүү их анхаарал хэрэгтэй байгаа үедээ жүжиглэх хандлагатай байдаг. Та хүүхдээ муухай авир гаргах үед нь тоохгүй орхиод үз.
Муу зан авирыг зогсоохын тулд бууж өгдөг
Эцэг эхийн бас нэг том алдаа бол зөвхөн богино хугацаанд анхаарлаа төвлөрүүлдэг явдал юм. Та хүүхдээ уурлаж, уйлах үед нь хурдан тайвшруулахын тулд хэлсэн үгээр нь байдаг уу? Энэ нь асуудлыг хурдан шийдэж байгаа мэт боловч зан авирыг улам дордуулж байдаг. Таны хүүхэд эрүүл, хариуцлагатай хүн болоход тодорхой ур чадвар шаардагдана. Тиймээс сахилга батын хамгийн үр дүнтэй стратеги нь ойлгуулах.
Хүүхдүүд өөрийнх нь муу зан авирын үр дүнд ямар сөрөг үр дагавар гарч байгааг ойлгох хэрэгтэй. Хязгаарлалт тогтоож, шударга, тууштай, эрх мэдэл бүхий сахилгын стратеги гарга.
Тодорхой дүрэмгүй байх
Тодорхой дүрэм журам байхгүй үед хүүхэд төөрөлдөх магадлалтай. Магадгүй та дүрэм хэрэггүй гэж боддог хүн байж болно. Гэхдээ хүүхдийг эрсдэлээс хамгаалсан бяцхан дүрмүүд хэрэгтэй. Хүүхэд чинь тавилга дээр үсэрч унахад юу болох вэ?
Эсвэл дүрмийг хэрэгжүүлэх хүсэл эрмэлзэл нь таны ямар ааштай байгаагаас шалтгаалан өөр байж болно. Өчигдөр инээдтэй гэж бодож байсан зүйл чинь өнөөдөр таныг үнэхээр уурлуулахад хүргэж болзошгүй юм. Тиймээс хүүхдийг аюулаас хамгаалсан бяцхан дүрэм зохиж, яагаад болохгүй вэ гэдгийг тайлбарлаж өгөөрэй.
Төлөвлөгөө гаргадаггүй
Тодорхой төлөвлөгөөгүй бол ёс зүйгүй байдал үүсч, эмх замбараагүй болдог. Үүний үр дүнд хүүхдэд гар хүрэх тохиолдол ч гарч болно. Та хүүхэдтэйгээ хэрхэн зөв харилцах талаар төлөвлөгөө гаргаарай. Миний хүүхэд ямар зан авиртай, юунд дургүй вэ гэх мэтчилэн бодоод харилцааны төлөвлөгөө боловсруул.
Буруу зан үйлийн асуудлуудыг зохицуулах талаар ярихдаа реактив гэхээсээ илүү идэвхтэй байх нь дээр. Хэрэв хүүхэд дүрмийг зөрчвөл хэрхэн хариу үйлдэл үзүүлэхээ мэдэхийн тулд зан үйлийн цогц төлөвлөгөө боловсруул. Асуудлыг тодорхой төлөвлөгөөний дагуу шийдэх нь хүүхдийн хүмүүжилд чухал ач холбогдолтой. Өрхийн дүрмийн жагсаалтыг бичгээр гаргаарай. Ингэснээр хүүхдийн хүлээлтээс үүдсэн стрессийг /хүүхэд буруу зүйл хийсэн үедээ намайг яах бол гэж боддог/ бууруулдаг.
Эх сурвалж: Verywellfamily
