Монгол Улсын Гавьяат тамирчин, Олимп, Дэлхийн аваргын мөнгөн медальт Н.Төгсцогт ээлжит тулаанаа энэ сарын 19-нд хийхээр болсон. Н.Төгсцогтын хувьд мэргэжлийн боксын рингэнээ 12 тулаан хийн 11 ялж, нэг ялагдсан үзүүлэлттэй байна. Тэрээр хамгийн сүүлд буюу энэ оны хоёрдугаар сарын 8-нд Гари Рассел Жуниортой тулалдан мэргэжлийн боксын замналдаа анхны ялагдлаа хүлээсэн юм.
Тэрээр энэ удаагийн тоглолтондоо “Алтан Дорнод Монгол” ХХК-ийн логотой өмсгөлтэй тоглох бөгөөд өмсгөл дээрээ “Монгол үндэстэн, монгол хэл, бичиг үүрд” хэмээн бичүүлжээ.
Тэрээр энэ тухай өөрийн цахим хуудаснаа “ Тулаан эхлэхэд яг долоо хоног үлдлээ. Үндсэн бэлтгэлээ дууслаа. Маргааш шинэ оргил руу тэмүүлэхээр зорино. Монгол хүний арга ухаан, хүч чадлыг харуулж , босоо бичиг шигээ босоо хийморьтой тулалдахыг бүх талаараа хичээх болно” хэмээжээ.
