СЭМҮТ-ийн Хүүхэд, өсвөр үеийн клиникийн эрхлэгч Л.Цэрэндолгор дэлгэцийн хэрэглээний талаар дарах мэдээллийг өглөө.
Хүүхэд, өсвөр үеийнхний дунд хийсэн дэлгэцийн хэрэглээний талаарх судалгаанаас танилцуулна уу?
СЭМҮТ-ийн хүүхэд, өсвөр үеийн клиникт хэвтэн эмчлүүлсэн хүүхдүүдийн дунд хийсэн сүүлийн таван жилийн судалгаанаас харахад 11-15 насныхны дунд дэлгэцийн хэтрүүлэн хэрэглээнээс үүссэн эмгэг их байна. Мөн түүний 99 хувь эрэгтэй хүүхдүүд байгаа юм.
Дэлгэцийн хэтрүүлэн хэрэглээ нь нойргүйдэл, сэтгэл түгшил, сэтгэл гутрал, цаашлаад өсвөр үеийнхний амиа хорлолтод шууд бус замаар нөлөө үзүүлдэг.
Цахим хэрэглээний хамаарлын талаар мэдээлэл өгнө үү?
- Цахим хэрэглээний хамаарлыг дотор нь хэд хэдэн төрөлд хуваан үздэг.
- Текстийн хамаарал- Текстийн хамаарал гэдэг нь твиттер болон цахим сүлжээн дэх хүмүүсийн сэтгэгдлийг унших хамаарлыг хэлнэ.
- Ухаалаг утасны хамаарал
- Медиа хамаарал- Зурагт болон видео үзэх байдлыг хэтрүүлснээс үүдэх эмгэгийг хэлнэ.
- Цахим тоглоомын хамаарал- Компьютер, телевиз, гар утас, таблет ашиглан удаан хугацаагаар, олон цагийн давтамжтай тоглохыг хэлнэ.
- Онлайн мөрийтэй тоглоом
Дээрх шинж тэмдгүүд илэрвэл хаана хандах вэ?
Дээрх шинж тэмдгүүд танд болон таны хүүхдэд илэрвэл харьяа аймаг, дүүргийн сэтгэцийн эмчид хандан зөвлөгөө мэдээлэл авах боломжтой. Мөн 1800-2000 гэсэн 24 цагийн утсаар холбогдон зөвлөгөө авч болно. Хамгийн гол зүйл бол цахим хэрэглээний хамаарлаас урьдчилан сэргийлэх явдал юм.
Ямар хугацаанд дэлгэц ашиглавал зохистой хэмжээнд тооцогдох вэ?
Зохистой хэрэглэх хугацаа:
- 0-2 нас: огт хэрэглүүлэхгүй байх
- 3-6 хүртэлх нас: хоногт 1-1,5 цаг
- 6-12 нас: хоногт 1,5-2 цаг
- 13-18 хүртэлх нас: хоногт 2-2,5 цаг
- Насанд хүрэгчид: хоногт 3 цаг /ажлын шаардлагаар илүү хэрэглэх бол 1 цаг тутамд амарч байх/
Хэрэглэх зарчим
- Нэг удаад 20-30 минут хэрэглэх
- Хүүхдийн насанд нь тохирсон контент эсэхэд хяналт тавих
- Хүүхэдтэйгээ ярилцаж, тохиролцох
- Эцэг, эх хүүхдэдээ зөв үлгэрлэх
