УНТЭ-ийн Бөөрний төвийн эмч, АУ-ны доктор А.Саруултүвшин бөөрний өвчлөлийн талаар мэдээлэл өгснийг сийрүүлэн хүргэе.
– Сүүлийн үед зонхилон тохиолдож буй бөөрний өвчлөлийн талаар мэдээлэл хүргэнэ үү?
– Сүүлийн үед бөөрний архаг өвчлөлийн талаар нэлээн ярих босон Бөөрний архаг өвчин үүсэхэд олон хүчин зүйл нөлөөлдөг. Үүний шалтгааныг бүлгээр нь аваад үзвэл амьдралын хэв маяг, бодисын солилцооны өвчин, нийгмийн стресстэй холбоотой байна.
Нийгмийн стресстэй холбоотой эмгэг гэдэгт цусны даралт ихсэх өвчин, чихрийн шижин, тулай зэрэг багтана. Манай орны хувьд сүүлийн жилүүдэд чихрийн шижин, цусны даралт ихсэх өвчин нилээн нэмэгдэж байгаа. Цусны сахар ихсэх, даралт ихсэх өвчнүүд нь даамжирснаар бөөрний эмгэг үүсгэдэг.
– Тэгвэл эдгээр өвчнөөс сэргийлэхийн тулд юуг анхаарах вэ?
– Эдгээр өвчнөөс урьдчилан сэргийлэхийн тулд амьдралын хэв маягт анхаарна. Тухайлбал биеийн жингээ барьж, стресст өртөхгүй байх хэрэгтэй. Стресст өртлөө ч зөв тайлж сурах нь зүйтэй. Мөн идэвхтэй хөдөлгөөн хийх бөгөөд хоолны дэглэм чухал нөлөөтэй.
– Бөөр шээсний халдварын талаар үргэлжлүүлэн ярилцъя?
– Энэ нь бөөрний өвчлөл дундаас тохиолдлын тоогоороо нэгдүгээрт ордог. Энэ өвчний үед мөн л амьдралын хэв маяг, бэлгийн замын ариун цэвэрт маш сайн анхаарна. Манай орон хүйтэн, сэрүүн уур амьсгалтай учраас доороосоо даарахгүй байх хэрэгтэй.
Нэгэнт өвдсөн тохиолдолд өвчнийг эрт оношлуулаад зөв эмчилнэ. Тохирсон эмийг эмчийн заавраар ууна. Тэгэхгүй бол эмэнд тэсвэртэй нянгийн халдвар нэмэгдэж байна.
– Бөөрний түүдгэнцрийн эмгэг хэр тохиолдож байна вэ. Энэ талаар мэдээлэл өгнө үү?
– Бөөрний түүдгэнцрийн эмгэг нь хүний бие махбодын дархлалын тогтолцооны тэнцвэрт байдлын алдагдалтай холбоотой үүсдэг. Тохиолдлын тоогоороо төдийлөн өндөр биш боловч өвчний хоруу чанар өндөр учраас бөөрний архаг дутагдалд хүргэдэг.
Энэ өвчний үед шинж тэмдэг бүдэг явагддаг учраас урьдчилан сэргийлэх үзлэг маш чухал. Ямар ч хүн жилдээ нэг удаа урьдчилан сэргийлэх үзлэгт ороод, шээсний ерөнхий шинжилгээгээр өөрчлөлт гарсан тохиолдолд нарийн мэргэжлийн эмчид үзүүлнэ.
Нэгэнт бөөрний архаг дутагдалд орсон хүнд бөөр орлуулах эмчилгээг хийнэ. Амьдрах бүрэн боломжтой. Бөөрний орлуулах эмчилгээний гурван аргыг дэлхий дахинд ашиглаж байна. Үүнд, цус шүүх эмчилгээ буюу гемодиализ, бөөр шилжүүлэн суулгах, хэвлийн диализ эмчилгээ ордог.
