Жирэмсэн болсноо хамгийн хурдан хэд хоногийн дотор мэдэх боломжтой вэ?
Сарын тэмдэг ирэх ёстой хугацаандаа ирэхгүй байх нь хамгийн энгийн, амархан мэдэх арга юм. Харин сарын тэмдэг ирэхээс өмнө жирэмсэлсэн эсэхээ мэдэхийг хүсвэл жирэмсний тестээр шалгаарай. Бэлгийн харилцаанд орсноос 7-10 хоногийн дараа мэдрэг сайтай тестээр шалгахад жирэмсэлсэн эсэх нь мэдэгдэх боломжтой. Үр тогтсон ч хоног багатай байх үед жирэмсний тестийн зураас бүдэг гардаг ба нэг юм уу хоёр долоо хоногийн дараа дахин шалгахад уг зураас тодорсон байх болно.
Би жирэмсэн болчихжээ, гэхдээ хүүхдээ төрүүлмээргүй байна, яах вэ?
Энэ бол аль ч насны эмэгтэй хүнд тохиолдож болох хүндхэн асуудлын нэг юм. Насанд хүрсэн эмэгтэйчүүд өөрсдөө эмнэлэгт хандаад зөвлөгөө, тусламжаа авдаг бол өсвөр насны охидын хувьд аав ээждээ хэлэхээс айх, чухам хэнд яаж хандахаа мэдэхгүйгээс болж, хугацаа алдсанаар хүүхдээ хэт томруулж /12 долоо хоногоос дээш хугацаатай/ өөрийгөө улам эрсдэлд оруулдаг. Хүүхэд өдрөөс өдөрт томорч байдаг учраас жирэмсэн гэдгээ нууж явах нь асуудлыг шийдэх биш бүр дор байдалд оруулна гэдгийг сайн санах хэрэгтэй юм шүү.
Ихэнх охид интернэт болон зараар зулбуулдаг гэх баталгаагүй эм авч уудаг. Энэ нь маш олон эрсдлийг дагуулна. Уг эмийг ууснаар маш хүчтэй өвдөлт өгөх, их хэмжээний цус алдах, ураг бүрэн зулбахгүйгээр саванд үлдсэнээр амь насаа ч алдах тохиолдол гардаг. Уг эмийг мэргэжлийн эмчийн хяналтан дор ууж, зулбалтын дараа эхогоор шалган шаардлагатай эмчилгээг хийдэг гэдгийг анхаараарай.
Дур мэдэн гэртээ ууж хэрхэвч болохгүй. Тиймээс чи хэрвээ жирэмсэн болсон бол аав ээж, асран хамгаалагчдаа, ойр дотны ах эгчдээ эсвэл сургууль, харьяа дүүргийнхээ өсвөр үеийн эмчид тэр дор нь хэлэх хэрэгтэй. Ингэснээр хүүхдээ төрүүлэх эсэхээ зөвлөлдөх, төрүүлэхгүй байхаар шийдсэн бол эмнэлгийн тусламжийг цаг алдалгүй авах, аюулгүй баталгаатай орчинд үр хөндөлт хийлгэх боломжтой болно.
Үр хөндөлт гэж юу вэ?
Жирэмслэхээр төлөвлөөгүй ч хамгаалах хэрэгсэл хэрэглэлгүй эсвэл буруу хэрэглэн сексийн харилцаанд орсноор хүсээгүй жирэмслэлт гэх хүндхэн асуудалтай нүүр тулдаг. Жирэмслэлтийг зориудаар таслан зогсоох үйлдлийг үр хөндөлт гэнэ. Үр хөндөлтийг жирэмсний эхний 12 долоо хоногийн дотор эмэгтэйн өөрийн хүсэлтээр хийдэг. Харин үр хөндөлтийг 13-22 долоо хоногийн хугацаанд /хожуу үр хөндөлт/ зөвхөн эмчийн заалтаар хийдэг.
Үр хөндөлтийг заавал мэргэжлийн эмчийн хяналтанд, эмнэлэгт, асран хамгаалагчийн хамт очиж хийлгэх ёстойг анхаарах хэрэгтэй.
Эмч жирэмслэлтийн хугацаа, чиний биеийн байдлыг харгалзан үр хөндөх аргуудаас хамгийн тохиромжтойг санал болгоно.
Эмийн аргаар үр хөндөх – Эмийн аргаар үр хөндөх аргыг жирэмсний 8 долоо хоног хүртэлх хугацаанд хэрэглэж болно.
Эх сурвалж: Өсвөр насны охид: Тэд юуг мэдэхийг хүсдэг вэ? номоос
