С аминдэмийн талаар НЭМҮТ-өөс мэдээлэл өглөө. С аминдэмээр баялаг жимс, жимсгэнэ идэж дархлаагаа дэмжээрэй.
С аминдэм нь антиоксидант шинж чанартай, төмрийг шингээхэд тусалдаг, хоол хүнсэнд агуулагдах нитритийг бууруулснаар хорт хавдар үүсэх эрсдэлийг бууруулж, эсийн бодисын солилцоонд чухал үүрэгтэй.
Байгалийн гаралтай бүх төрлийн жимс, жимсгэнэ, нимбэг, жүрж, киви, амтат гуа болон цэцэгт байцаа (брокколи), амтат төмс, чинжүү, байцаа зэрэг хүнсний ногоо нь С аминдэмийн сайн эх үүсвэрүүд юм.
Тухайлбал, Цитрусын төрлийн жимс нь аминдэм, эрдэс бодис болон эслэгээр баялаг бөгөөд дархлаа дэмжих өндөр ач холбогдолтой. Цитрусын төрлийн жимсэнд амтат жүрж, бэрсүүт жүрж, мандарин, нимбэг зэрэг жимс ордог.
Цитрусын жимс нь С аминдэмийн маш сайн эх үүсвэр болохын зэрэгцээ усанд уусдаг болон уусдаггүй эслэг, кали, кальци, фосфор, магни, зэс, В1, В2, В3, В6 аминдэм, фолийн хүчил, пантотены хүчил болон олон төрлийн биологийн идэвхит бодисууд агуулдаг тул олон төрлийн өвчнөөр өвчлөх эрсдэлийг бууруулдаг. Мөн энэ төрлийн жимс нь өөх тос, холестерин, натри агуулдаггүй юм.
С аминдэм нь цусны цагаан эсийн үүсэлтийг нэмэгдүүлэх замаар дархлааг дэмждэг. Мөн эдгээр жимс нь хавдрын эсрэг үйлдэлтэй биофлавинойд агуулдаг байна. Флавинойд нь исэлдэлтийн эсрэг үйлдэлтэй тул чөлөөт радикалуудыг саармагжуулж хавдрын эрсдэлийг бууруулдаг. С аминдэм нь бие махбодыг чөлөөт радикалаас хамгаалдаг хүчтэй исэлдэлтийн эсрэг бодис бөгөөд шархны эдгэрэлт болон цусны судас, шөрмөс, мөгөөрс, холбоос эд, ясыг тогтоон барьдаг холбогч эдийн уураг болох коллагены нийлэгжилтэнд чухал шаардлагатай байдаг. Фолийн хүчил нь эсийн хуваагдал, дезорибонуклейн хүчлийн нийлэгжилтэнд оролцдог. Хүний бие махбод С аминдэмийг боловсруулж, нөөцөлж чаддаггүй тул өдөр тутам хоол хүнсээрээ авах шаардлагатай.
