Франц улсын “Boury-en-Bresse” шоронд хоригдож буй Монгол Улсын иргэн Г.Ган-Очир өнөөдөр утсаар шууд холбогдож, Үндэсний мэдээллийн төвд хэвлэлийн хурал зохион байгууллаа.
Тэрбээр “Сонгуулийн хар машины тогтолцооны талаар гурван жил тэмцэж байна. Монголд байгаа авлигачдыг хуулийн байгууллагад өгсөн ч шийдэгдээгүй. Тийм учраас Монголоос гарч, олон улсын байгууллагад улсынхаа талаар мэдээлэл өгөхөөр Европын улсад ирсэн. Гэтэл буруу хүмүүст итгэж, гүтгэгдээд Франц улсын шоронд орсон.
Франц улсын интерполын цагдаа нар намайг 2022 оны арванхоёрдугаар сарын 26-ны өдрийн 12:00 цагийн орчимд баривчилсан. Ямар шалтгаанаар баривчилсныг асуухад “Монгол Улсын засгийн газраас Франц улсын засгийн газарт 2022 оны есдүгээр сарын 1-нээс эхлэн намайг авах хүсэлтээ өгсөн” хэмээн тайлбарласан. Өөрөөр хэлбэл, интерполын шугамаар өнгөрсөн оны наймдугаар сарын 20-нд намайг эрэн сурвалжлах, баривчлах хүсэлт өгсөн юм билээ. Шоронд орсноос хойш дөрвөн удаагийн шүүх хуралд орлоо.
Миний хувьд Нидерландын Гаага хотын олон улсын эрүүгийн хэргийн шүүхэд анхан шатны материал шалгуулах хүсэлтээ 2023 оны зургаадугаар сарын 26-нд өгье гээд орчуулагчтай уулзаад явж байсан ч шоронд орчихсон.
Надад байсан нотлох баримт, хоёр хуудас хавтаст хэрэг эхнэр А.Ариунтуяад байгаа. Түүнийг манай ах Мөөгий, н.Отгонтуяа эгчид өгөөч ээ гэхээр өгдөггүй. Мөн өөрийн фэйсбүүк хуудсандаа оруулсан нотлох баримтыг эхнэр маань устгасан. Эдгээр нотлох баримтаа олж авахын тулд Франц улсын цагдаа нарт удаа дараа хандсан боловч надад хүлээлгэж өгөөгүй. Нотлох баримтууд нь ганц миний өмч биш, ард түмний өмч.
Шоронгоос надад “Fluoxetine arrow” гэдэг эмийг өдөр бүр өгдөг бөгөөд тархинд шууд нөлөөлж унтуулдаг болохоор уудаггүй. Хэрэв эмээ уугаагүй бол эмнэлэгт хүчээр дагуулж очоод өдөр бүр өндөр тунтай хар тамхины орц найрлагатай тариа хийдэг” гэв.
