Биеийн жингээ бууруулах дэглэмийн талаар УНТЭ-ийн нийгмийн эрүүл мэндийн албаны хоол зүйч Э.Санчир зөвлөгөө өглөө.
Биеийн жингээ бууруулахдаа юуг анхаарах вэ?
Цахим орчин дахь биеийн жинг бууруулах дэглэмүүдийн мэдээллийг харахад илчлэгийн хувь нь маш бага байдаг. Үүнээс шалтгаалаад
- Ядрах, сульдах
- Толгой эргэх
- Шим тэжээлийн дутагдалд орох эрсдэлтэй. Учир нь хоолноосоо хангалттай шим тэжээл авахгүй байгаатай холбоотой.
Мөн биеийн жинг хурдан хасах тусам цөсний замын өвчлөл үүсэх эрсдэл нэмэгддэг. Ялангуяа, эмэгтэйчүүд шим тэжээлийн хязгаарлалт хийснээрээ нөхөн үржихүйн үйл ажиллагаа нь алдагдах сөрөг талтай. Тиймээс хоолны дэглэм барих гэж байгаа бол эхлээд хоол зүйчээс өөрт тохирох дэглэмийн талаар зөвлөгөө аваарай.
Жин бууруулах нийтлэг дэглэмүүдийн мэдээллийг харахад ихэнх нь долоо, 14 хоногт, сард их хэмжээний жин /10-15 кг/ хаяна гэсэн байдаг. Шинжлэх ухааны үүднээс авч үзвэл энэ нь эрүүлээр жингээ хасаж байгаа зүйл биш. Хамгийн эрүүлээр биеийн жинг хасахад сард 2-3 кг турах боломжтой.
Хурдан хугацаанд жин хасах нь ямар эрсдэлтэй вэ?
- Маш бага илчлэг авснаар бодисын солилцоо удааширна.
- Энгийн дэглэмд шилжсэн үед илүү илчлэг нөөцлөх процесс биед явагдаж эргэн жин нэмж, дахин турахад хүндрэлтэй болно.