АУ-ны доктор, профессор, АШУҮИС-ийн Монгол Японы эмнэлгийн дурангийн зөвлөх эмч Х.Оюунцэцэг ходоодны өвчлөлийн талаар мэдээлэл өгснийг сийрүүлэн хүргэж байна.
Тэрээр “Монгол Улс ходоодны хорт хавдрын өвлөл, нас баралтын тохиолдлоороо дэлхийд тэргүүлж байгаа харамсалтай статистик байдаг. Ходоодны хорт хавдрыг үүсгэж буй шалтгаан, эрсдэлт хүчин зүйлд
- Удамшил
- Архи, тамхины хэрэглээ
- Хеликобактерийн халдвар
- Утсан, давсалсан хүнсний хэт их хэрэглээ
- Жимс, ногооны бага хэрэглээ багтдаг.
Удамшлын хүчин зүйл ховор тохиолддог бол бусад шалтгаанаас хүн өөрөө сэргийлж, ходоодны хорт хавдраар өвчлөхгүй байх боломжтой. Мөн ходоодны хорт хавдрыг эрт үед нь оношилбол эдгэрдэг, эмчлэгддэг. Монгол хүмүүст халдварлагдсан байгаа хеликобактер нь хоруу чанар ихтэй ходоодны шархлаа, хатингаршил, ходоодны хорт хавдар үүсгэх өндөр эрсдэлтэй болох нь нэгэнт тогтоогдсон.
Ходоодны хорт хавдрын эхэн үед ямар ч зовиур шаналгаа байдаггүй. Тийм учраас хүмүүс эмнэлэгт үзүүлэхгүй байна. Гэтэл зовиур өгсөн үед эмчид хандахад хожуу үедээ орсон байдаг. Тиймээс эрт үед нь оношлуулахын тулд дурангийн шинжилгээ өгөх хэрэгтэй.
Мөн би дараах хэдэн зүйлийг зөвлөмөөр байна.
- 45-аас дээш насныхан ходоодны дурангийн урьдчилан сэргийлэх үзлэгт хамрагдах
- Төрөл садан нь ходоодны хорт хавдраар өвчилж байсан бол нас харгалзалгүй үзлэгт хамрагдах
- Хеликобактерийн халдвар оношлогдсон бол эмчлүүлж, дахин халдвар авахаас сэргийлэх
- Утсан, давсалсан хүнсний хэт их хэрэглээг хязгаарлах
- Жимс, ногооны хэрэглээг нэмэгдүүлэх шаардлагатай” гэлээ.