Сүүлийн үед ГССҮТ-ийн гар сарвууны тасагт олон тооны хүн өдөр тутмын хэрэглээг хөнгөвчлөх багаж, техникээс болж гэмтэж ирж, насан туршдаа тахир дутуу болох эрсдэлд орсоор байгааг ГССҮТ-ийн Гар сарвууны гэмтэл согогийн мэс засалч их эмч Л.Нанжид хэллээ.
Тэрбээр фэйсбүүк дэх өөрийн албан ёсны цахим хуудсаараа дамжуулан сэрэмжлүүлэг хүргэхдээ “Сүүлийн үед техник технологи хөгжихийн хэрээр хүний хийж бүтээх өдөр тутмын хэрэглээ үйлдвэр үйлчилгээний ажлыг хөнгөвчлөх хялбарчлах олон төрлийн цахилгаан бараа бүтээгдэхүүн их гарах болж.
Үүнд гурил зуурагч, гурил илдэгч, мах машинддаг, мах хэрчдэг, яс хөрөөддөг мөн олон төрлийн миксерүүд гэх мэт ахуйн хэрэглээний машинууд, тастагч, гар хөрөө, цахилгаан харуул зэрэг мужааны багаж хэрэгслүүд орно. Хэдий хүн багаж техникээр ажлаа хөнгөн хялбар хийж болох ч аюулгүй ажиллагаа болон санамсар болгоомжгүй байдлаас үүсэх осол маш ихээр гаргаж байна.
Сүүлийн үед Гар сарвууны тасагт олон тооны хүмүүс энэ байдлаас болж гэмтэж, бэртэн ирж насан туршдаа тахир дутуу болох хөдөлмөрийн чадвараа алдах эрсдэлд орсоор байна. Тиймээс ойр тойрныхоо хүмүүс болон ах дүүс хамаатан садандаа болгоомжтой байхыг анхааруулж өгөөрэй” гэжээ.