Элэгний В вирусийн эсрэг эмийн 90 хоногийн хэрэглээг нэг дор бичдэг болжээ. Энэ талаар ЭМДЕГ-ын өагц хариуцсан ахлах мэргэжилтэн Б.Янжиндолгор мэдээлэл өглөө.
Тэрээр “ЭМДҮЗ-ийн 2022 оны 11-р тогтоолоор эмийн үнийн хөнгөлөлтөд үзүүлэх жагсаалтад элэгний В вирусийн хоёр ерөнхий нэршлийн, дөрвөн худалдааны нэршлийн эм багтсан байдаг. Эдгээр эмүүдийг ЭМД-ын сангаас 50 хувийн хөнгөлөлттэй олгож байгаа. Элэгний В вирусийн эсрэг эмийг эмч нар нэг сарын хугацаатай бичиж өгдөг байсан бол одоо 90 хоног хүртэлх хугацааны ЭМД-ын хөнгөлөлттэй бичүүлж авах боломжтой болсон” гэлээ.
Эрүүл мэндийн сайдын 2018 оны А288 дугаар тушаалын дагуу 90 хоног хүртэлх хугацаанд хэрэглэх элэгний В вирусийн эсрэг эмийг нэг удаагийн жороор бичүүлэх боломжтой болсон. Ингэхдээ эмчийн бичсэн эмчилгээний үргэлжлэх хугацаанаас хамаарч дараагийн жор бичих хугацаа шалтгаалах тул эмчээр нэг удаагийн жор бичүүлэхдээ өөрийн боломжит хугацаанд тохирсон тоо, ширхэгтэй эмийг худалдан авахыг ЭМДЕГ-аас зөвлөлөө. Учир нь эмчийн бичсэн хэмжээнээс цөөн эм худалдан авсан тохиолдолд эмийн жорын хугацааг дуустал үлдсэн эмээ нөхөж авах боломжгүйг анхаарах хэрэгтэй аж.
