ТТАХНЭ-ийн дотоод шүүрлийн их эмч Н.Уянга чихрийн шижин өвчний талаар мэдээлэл өглөө.
Чихрийн шижин өвчний эрсдэлт хүчин зүйл нь юу вэ?
Чихрийн шижин өвчнийг дөрвөн бүлэгт хуваан үздэг. Үүнээс хүн амын дунд хамгийн элбэг тохиолддог нь чихрийн шижин хэв шинж II юм. Чихрийн шижин II хэв шинжийг үүсгээд байгаа хүчин зүйлийг өөрчлөх боломжтой, өөрчлөх боломжгүй гэж ангилдаг. Боломжгүй гэдэгт удамшил, нас, жирэмсэн үеийн чихрийн шижингийн өгүүлэмж, эмэгтэйчүүдийн өндгөвчний олон уйланхайт хам шинж зэрэг багтана.
Харин өөрчлөх боломжтой гэдэгт биеийн жингийн илүүдэл, таргалалт, хөдөлгөөний хомсдол, эмийн зохисгүй хэрэглээ зэрэг амьдралын хэв маягийн шалтгаанууд ордог.
Чихрийн шижин өвчний үед ямар шинж тэмдэг илэрдэг вэ?
Юун түрүүнд ам цангах шинж илэрнэ. Мөн их уух, их шээх, нүд бүрэлзэх гэх мэт шинж илэрдэг бөгөөд ийм зовиур ажиглагдвал жил болгон эрт илрүүлдэгт хамрагдах хэрэгтэй. Чихрийн шижин өвчин нэгэнт оношлогдсон бол хяналт хамгийн чухал. Чихрийн шижин оношлогдсон хүн маань өөрөө глюкозоо хоолноос хоёр цагийн дараа, мөн орой унтахын өмнө үзнэ. Аль болох жингээ барих хэрэгтэй. Тэр дундаа хэвлийн таргалалтыг анхаарах шаардлагатай.
Түүнчлэн артерийн даралтыг 130/80-аас дотогш байлгах хэрэгтэй бөгөөд гэрээрээ хянаад явах боломжтой. Эмчийн зөвлөсөн эмийг уух хэрэгтэй.
Чихрийн шижин өвчний үед юу анхаарах вэ?
Хооллолтдоо анхаарах ёстой бөгөөд дасгал хөдөлгөөн хийнэ. Долоо хоногт 5 удаа нэг удаадаа 30-аас дээш минут дасгал хийнэ. Үүнээс гадна хөлийн арчилгааг маш сайн хийж байх ёстой.
Чихрийн шижинтэй хүн маань харьяа дүүргийн дотоод шүүрлийн эмчийн хяналтад орсон байна. Ингэхдээ 3-6 сар тутам очиж шинжилгээнд хамрагдаж, эмийн үзлэг зөвлөгөө авна. Мөн эмчийн зөвлөсөн тунгаар эм тариагаа хэрэглэнэ. Чихрийн шижин нь хүндэрвэл аюултай учраас хяналт маш чухал шүү.
