Хувь хүний орлогын албан татварын тухай хуулийн өөрчлөлтөөр хувиараа бизнес эрхлэгчдийн төлөх татварын хэмжээ нэмэгдэнэ, банкны дансны гүйлгээнээс татвар авна гэх зэрэг мэдээллүүд цахимд тархсан. Тэгвэл уг асуудлын талаар холбогдох хүмүүсийн өгсөн мэдээллийг нэгтгэн хүргэж байна.
Б.Тэлмүүн: Татварын өөрчлөлт сарын 10 сая төгрөгөөс дээш цалинтай 1300 хүнд хамаарна
Сангийн яамны Татварын бодлогын газрын дарга Б.Тэлмүүн: УИХ-аас 2023 оны төсвийн тухай хуулийг дагалдуулаад Хувь хүний орлогын албан татварын тухай хуульд өөрчлөлт оруулсан. 2023 оноос эхлэн мөрдөгдөх Хувь хүний орлогын албан татварын тухай хуулийн өөрчлөлт нь зөвхөн сарын 10 сая төгрөгөөс дээш цалингийн орлоготой 1,300 хүнд хамаарна.
Сард 10 сая төгрөгөөс дээш цалингийн орлоготой хүмүүсийн 10 саяас давсан хэсэгт нь 15 хувийн татвар ногдохоор хуулийн өөрчлөлт орсон. Сарын 10 сая төгрөгөөс доош орлоготой нийт иргэн хувь хүний 99.9%-д энэ татвар нөлөө үзүүлэхгүй.
Энэ татварын өөрчлөлтөөр хувиараа бизнес эрхлэгчдийн одоогийн татварт өөрчлөлт орохгүй. Банкны дансны гүйлгээнээс татвар авах мэтээр олон нийтийн сүлжээнд явж байгаа мэдээлэл нь үндэслэлгүй буруу ташаа мэдээлэл.
Б.Заяабал: ХХОАТ-ын тухай хуулийн өөрчлөлт нь 10 сая төгрөгөөс дээш орлоготой хүнд хамаарна
Татварын Ерөнхий Газрын дарга Б.Заяабал: 2023 оноос эхлэн мөрдөгдөх Хувь хүний орлогын албан татварын тухай хуулийн өөрчлөлт нь зөвхөн сарын 10 сая төгрөгөөс дээш цалингийн орлоготой 1,300 хүнд хамаарна.
Сарын 10 сая төгрөгөөс доош орлоготой нийт иргэн хувь хүний 99.9%-д энэ татвар нөлөө үзүүлэхгүй. Энэ татварын өөрчлөлтөөр хувиараа бизнес эрхлэгчдийн одоогийн татварт өөрчлөлт орохгүй. Банкны дансны гүйлгээнээс татвар авах мэтээр олон нийтийн сүлжээнд явж байгаа мэдээлэл нь үндэслэлгүй буруу ташаа мэдээлэл юм.
МТА: Таны дансны орлогоос шууд татвар авахгүй, санаа зовох зүйлгүй
МТА: Иргэдийн дансны орлогоос татвар авахгүй. Манай улс иргэд нь өөрсдөө олсон орлогоо тайлагнаж, татвараа төлдөг хуультай. Тиймээс таны данснаас шууд татвар авахгүй, та санаа зовох зүйлгүй. Харин 2023 оноос хувь хүний орлогын албан татварын хуульд нэмэлт өөрчлөлт орж, сарын 10 сая төгрөгөөс дээш цалинтай иргэдэд шаталсан хувь хэмжээгээр татвар ногдуулна. Үүнд өндөр орлоготой 1300 иргэн л хамрагдана.
Тухайн хуулийн нэмэлт өөрчлөлтөд тусгасан 14, 18-р зүйлд заасан орлого гэдэг нь иргэдийн цалин, хөдөлмөрийн хөлсний орлогыг тодорхойлсон заалтууд юм. Сард 10 сая төгрөг хүртэлх цалингийн орлоготой иргэний татвар огт нэмэгдээгүй хуучин шигээ хувь, хэмжээгээр татвараа төлнө.
