Халдварт өвчин судлалын үндэсний төвөөс цаг үеийн асуудлаар мэдээлэл хийлээ.
ХӨСҮТ-ийн томуугийн үндэсний нэгжийн эмч Ч.Уртнасан “Эмнэлэгт хэвтэж байгаа хүүхдүүдийн 66 хувь нь амьсгалын замын халдварт өвчтэй байна. Харуулдан тандалтын нэгжүүдэд ирсэн сорьцод реновирус, бокавирус, хүний метапневмовирус, Н-томуу зэрэг вирус зонхилон илэрсэн. Мөн сорьцуудад SARS-Cov-2 коронавирусийн тандалтыг зэрэг хийхэд SARS-Cov-2-ийн илрэлт нэмэгдсэн.
Бокавирус, хүний метапневмовирус, Н-томуу нь 0-5 настай хүүхдүүдийг түлхүү өвчлүүлж, ларингит хэлбэрээр хүндрэл үүсгэдэг. Мөн энэ гурван вирусийн онцлог нь хурдан хугацаанд уушгины хатгаа үүсгэдэг өвөрмөц шинж тэмдэгтэй. Иймд бага насны хүүхдэд томуугийн шинж тэмдэг илэрч байвал дураараа эмчлэхгүйгээр заавал эмнэлгийн байгууллагад хандахыг зөвлөе” гэлээ.
Амбулаториор үйлчлүүлж буй хүмүүсийн 10 орчим хувь нь томуу, томуу төст өвчтэй байгааг ХӨСҮТ-өөс мэдээллээ. Харин эмнэлэгт хэвтэн эмчлүүлж буй хүмүүсийн 16 хувь нь амьсгалын замын хүнд халдварын шалтгаантайгаар эмчлүүлж байгаа юм.