Ц.Билэгтсайхан: Шинэ жилийн арга хэмжээ халдварт өвчний эрсдэлийг шууд нэмэгдүүлнэ

0
104

Халдварт өвчин судлалын үндэсний төвөөс цаг үеийн асуудлаар мэдээлэл хийлээ.

Энэ үеэр ХӨСҮТ-ийн Ерөнхий захирал Ц.Билэгтсайхан “Коронавируст халдварын нөхцөл байдал амаргүй байна. Ковид19-ийн шалтгаант нас баралт бүртгэгдээд эхэллээ. Иймээс вакцинжуулалтад хамрагдах шаардлага урган гарч байна” гэдгийг хэлсэн юм.

Мөн тэрбээр “Шинэ жилийн арга хэмжээ халдварт өвчний эрсдэлийг шууд нэмэгдүүлнэ. Иймээс иргэд маань өөрийн хариуцлагаа нэмэгдүүлж, аливаа арга хэмжээнд орохдоо, гадаад дотоодод зорчихдоо эрсдэлээ тооцож, хариу арга хэмжээнүүдийг авах хэрэгтэй гэдгийг” зөвлөлөө.

Түүнчлэн, Манай улсад 45 дугаар долоо хоног буюу арваннэгдүгээр сарын 7-13-нд нийт 1,192 ковидын тохиолдол бүртгэгдсэн тухай Халдварт Өвчин Судлалын Үндэсний Төв(ХӨСҮТ)-өөс мэдээлэв.

Үүнээс өмнөх долоо хоногт 772 байв. Түүнчлэн эрүүл мэндийн ажилтан ажлын байран дээрээ өвдсөн тохиолдол өмнөх долоо хоногт нь 37  байсан бол 45 дахь долоо хоногт 99 болж, бараг гурав дахин өслөө.

Илэрч буй сорьцуудад хувилбарын тандалт хийж үзэхэд, сүүлийн хоёр долоо хоногт BQ.1.2 дэд хувилбар нийт сорьцын 30 хувьд, BF.7 дэд хувилбар 1-2 хувьд тодорхойлогдож байсан бол найман хувьд хүрч өссөн байна.

Коронавирусийн халдварын тохиолдол нэмэгдсээр байгаа тул дотоод орчинд амны хаалтаа тогтмол зүүх, гараа угааж, ариутгах зэрэг дэглэмийг үргэлжлүүлэн мөрдөхийг эрүүл мэндийн байгууллагаас зөвлөж байна.