Монгол Улсын Ерөнхийлөгч Ухнаагийн Хүрэлсүх зарлиг гарган, Монголын сонгодог урлагийн дэг сургууль, чадвар, чансааг дэлхийн тавцанд хүлээн зөвшөөрүүлж, дэлхийн хэмжээний дуучин хэмээн үнэлэгдэн, олон улсад эх орныхоо нэр хүндийг өсгөхөд үнэтэй хувь нэмэр оруулсан Улсын дуурь, бүжгийн эрдмийн театрын гоцлол дуучин, Гавьяат жүжигчин Энхбатын Амартүвшинд Монгол Улсын Ардын жүжигчин цол хүртээв.
Тэрээр шагналаа авсныхаа дараа сэтгэгдлээ хуваалцлаа.
Ардын жүжигчин Э.Амартүвшин “Өнөөдөр миний амьдралд хэзээ ч мартагдахааргүй гайхамшигтай түүхэн сайхан өдөр болж байна. Өнөөдөр дээд төр маань, эрхэм төрийн тэргүүн маань Монгол улсын ардын жүжигчин хэмээх энэ нэр хүндтэй сайхан шагналыг надад олголоо. Олон улсад эх орныхоо нэрийг гаргасныг маань өндрөөр үнэлж өнөөдөр энэ сайхан шагналыг олголоо гэж бодож байна. Монголынхоо нийт ард түмэнд, төрүүлж өсгөсөн аав ээждээ, эрдэмтэн багш нартаа, ажлын хамт олон, хань ижил, найз нөхөд, ах дүү төрөл төрөгсөд, намайг таньдаг бүх хүмүүстээ бүгдэд нь баярлалаа гэж хэлмээр байна.
Ямар нэгэн зүйл рүү хазайлгүй, зөвхөн зорьсон, дуртай, өөрийнхөө хүсэж мөрөөдсөн зүйлийнхээ хойноос явсны маань үр шим өнөөдөр гарч ард түмэн, төр засаг өндрөөр үнэлж энэ сайхан шагналыг олгож байна. Энэ нэр хүндтэй сайхан шагналыг дааж, Монгол улсынхаа нэрийг Олон улсад өндөрт өргөж явахын төлөө хичээнэ” гэлээ.