Хятадын өмнөд хэсэгт орших Хайнань арал 2030 он гэхэд бензин, дизель хөдөлгүүртэй автомашины худалдааг хориглох төлөвлөгөөтэй байгаагаа мэдэгджээ.
Хайнань арлын захиргааны мэдэгдэлд, хүлэмжийн хийн ялгарлыг бууруулах зорилгоор уг алхмыг хийж байгаа бөгөөд ийм арга хэмжээ авсан Хятадын анхны бүс нутаг болно хэмээсэн байна.
Түүнчлэн 2025 он гэхэд нийтийн тээврүүдээ цэвэр эрчим хүчээр ажилладаг тээврийн хэрэгслээр шинэчлэх болно гэж мэдэгдэлд дурджээ.
Хайнань арлын засаг захиргааны танилцуулсан “Хүлэмжийн хийг хязгаарлах төлөвлөгөө” баримт бичигт уламжлалт бензин, дизель хөдөлгүүртэй автомашины худалдааг 2030 оноос эхлэн хориглох, цахилгаан автомашиныг татвараас чөлөөлөх, цэнэглэх станцын дэд бүтцийг өргөжүүлэх дэд төлөвлөгөөнүүд тусгагджээ.