Эрүүл мэндийн сайд С.Энхболд улсын хэмжээнд тавдугаар сарын 1-нээс эхлэн орон даяар зохион байгуулж буй эрт илрүүлэг, урьдчилан сэргийлэх үзлэгийн эхний гурван сарын дүн мэдээг танилцууллаа.
Тэрээр “2022 оны тавдугаар сарын 1-нээс наймдугаар сарын 1-нийг хүртэлх гурван сарын хугацаанд улсын хэмжэээнд 272,434 хүн урьдчилан сэргийлэх үзлэгт хамрагдлаа. Үүний 51,4 хувь нь нийслэлийн иргэд байна.
Нийслэлд Баянзүрх, Сонгинохайрхан дүүрэг, аймгуудаас Төв, Хөвсгөл, Дархан-Уул аймгийн иргэд үзлэгт хамгийн идэвхтэй хамрагдаж байна. Үзлэгт хамрагдсан иргэдийн 136.241 иргэнд давхардсан тоогоор өвчлөл бүртгэгдлээ. Иргэдийн дунд,
- Хоол боловсруулах тогтолцооны эмгэг 66.4 хувь
- Дотоод шүүрэл, шээс бэлгийн зам болон амьсгалын замын эмгэгүүд удаах байрыг эзэлж байна.
Нийт үзлэгт хамрагдсан иргэдээс хортой болон хоргүй хавдрын 844 сэжигтэй тохиолдол бүртгэгдсэн. Эдгээрээс 201 нь хортой байх магадлалтай байсан бөгөөд дараагийн шатлалын эмнэлэгт нарийн шинжилгээг хийх шаардлагатай байгаа.
272.4 мянган иргэний 170 мянга нь 0-17 насны хүүхэд бөгөөд хүүхдүүдийн дунд амны хөндийн эмгэг, шүд цоорох, нүдний харааны өөрчлөлт, шүдний гаж хөгжил хамгийн өндөр байгаа тул дараагийн арга хэмжээг төлөвлөж байна” гэлээ.
