Элэг нь хүний биед маш чухал олон үүргийг гүйцэтгэдэг. Тодруулбал, цөс үүсэхэд оролцох, бие махбодыг хоргүйжүүлэх, хуучирсан цусны улаан эсийг задлах, эрдэс бодис, амин дэм, сахарыг хадгалах, бодисын солилцоог зохицуулах, цусны бүлэгнэлтэд оролцох зэрэг олон чухал үүргийг гүйцэтгэдэг байна.
Вирусын халдвар, насжилт, ажлын ачаалал, архины хэрэглээ, таргалалт, эмийн зохисгүй хэрэглээ зэрэг олон шалтгааны улмаас элэг хэмээх энэхүү амин чухал эрхтэн өвчилдөг.
Элэгний өвчтэй хүмүүсийн хувьд үндсэн эмчилгээ нь хоолны эмчилгээ юм. Учир нь хоол боловсруулах замын эрхтэн хамгийн түрүүнд хоолноос эмчилгээ авдаг. Тиймээс насан туршдаа хоолны гам барих хэрэгтэй болдог. Эмчилгээний хоолыг хэрэглэж байгаа нөхцөлд ямар ч архаг өвчин сэдрэхгүй. Энэ нь эмийн эмчилгээнээс илүү үр дүнтэй гэдгийг мэргэжилтнүүд хэлж байгаа юм.
Эмчилгээний хоол дотроо олон янз. Тухайн хүний биеийн онцлог, өвчлөлийн байдлаас шалтгаалаад хэдэн ч хэсэгт хуваагдаж болдог. Хамгийн гол нь өдөрт тодорхой цаг хугацаанд тогтмол хооллож занших хэрэгтэй. Хоол идэхдээ хангалттай цаг гаргах нь мөн чухал.
Элэгний өвчний үеийн хооллолтын ерөнхий зарчмын талаар НЭМҮТ-өөс дараах зөвлөмжийг хүргэсэн байна. Тодруулбал,
-Уураг агуулсан хүнсний бүтээгдэхүүнийг нэмэгдүүлэх
-Хоногт хэрэглэх илчлэгийг хангалттай хэмжээгээр хэрэглэх,
-Хангалттай амин дэм, ялангуя В төрлийн амин дэмийг эмчийн заавраар хэрэглэнэ,
-Үр тариа, хүнсний ногоо, жимс голлон хэрэглэж, эслэгээр баялаг хүнсний бүтээгдэхүүн хэрэглэх,
-Бага багаар ойр ойрхон хооллох,
-Хоолны шимт бодисыг алдагдуулахгүй байх, шимэгдэлтийг сайжруулахын тулд жигнэх, чанах аргаар хоолыг бэлтгэнэ,
-Шарсан, хайрсан, даршилсан, нөөшилсөн, давсалсан, утсан болон өөх, тос ихтэй хүнсний бүтээгдэхүүн болон хоолыг хоолыг хориглох,
-Өөх тос, холестерины солилцоог сайжруулах хүнсийг хэрэглэнэ. Үүнд: аарц, өөх багатай бах, загас, овъёос, гурвалжин будаа, буурцаг, Е, С, В12, фолийн хүчил агуулсан хүнсний бүтээгдэхүүн багтана.
