Н.Түвшинбаярт холбогдох хэргийн шүүх хурал Хан-Уул дүүргийн Эрүүгийн хэргийн анхан шатны шүүхэд өглөөний 10:00 цагийн орчимд нээлттэй эхэлсэн.
Шүүх хуралдаан эхлэх үеэр түүний өмгөөлөгч Л.Данзанноров хохирогчийн зүгээс гаргасан хохирол зардлыг төлсөн баримтыг танилцууллаа. Тэрбээр “363 сая төгрөгийг өмнөх төлсөн хохирол дээрээ нэмж төлсөн баримт байна. Хохирогчийн сэтгэл санааны хохирлыг нөхөн төлөхөө илэрхийлсэн зарим баримтыг гаргаж өгч байгаа. Цаашдын амьжиргаа гэр бүл, үр хүүхдэд нь хэрэг болох болов уу гэсэн үүднээс өөрийн гэр бүлийн захиран зарцуулах эрхтэй хоёр үл хөдлөх хөрөнгийг шилжүүлэх талаар харилцан ярилцаж зөвшилцсөн. Энэ талаарх баримтуудыг гаргаж өгч байна” гэлээ.
Шүүх хуралдааны үеэр хохирогч Нандинцэцэгийн өмгөөлөгч н.Баасанжаргал шүүх хуралдааны яллах дүгнэлт уншиж сонсгох, гэрч Т.Ганзул, хохирогчийн хууль ёсны төлөөлөгч С.Гал-Эрдэнэ нарын мэдүүлгийг сонсох, нотлох баримт шинжлэх судлах хэсгийг бүхэлд нь хаалттай явуулах санал гаргасан байна.
Харин хохирогчийн өмгөөлөгч н.Бат-Ерөөлт яллах дүгнэлт унших хэсгийг бүхэлд нь нээлттэй сонсгож бусад хэсгийг хаалттай горимоор явуулах санал гаргажээ.
Хэсэг хугацааны дараа ХУД, БГД, СХД-ийн эрүүгийн хэргийн анхан шатны шүүхийн хэвлэл мэдээллийн ажилтан Г.Оюунцэцэг “Шүүх хурал нээлттэй-хаалттай горимоор явагдана” хэмээн мэдээлэл өгөв.
Шүүх хуралдаан 13 цаг 30 минутын үед 14:00 цаг хүртэл завсарлага аваад байсан бол хугацаа дуусаж, шүүх хуралдаан хэлэлцүүлгийн шатанд үргэлжилж байна.
Эргэн сануулахад, Н.Түвшинбаяр нь 2021 оны дөрөвдүгээр сарын 2-ны өдөр согтуурсан үедээ өөрийн найз Э.Энхбатыг зодож, хүнд гэмтэл учруулсан. Улмаар Э.Энхбат амь насаа алдсан харамсалтай явдал болсон билээ.
