Эмээлтийн мах боловсруулах үйлдвэрүүдийн асуудал олны анхаарлыг татаад буй. МХЕГ-аас төлөвлөгөөт бус хяналт, шалтгалт үргэлжилж, “Эм Ди Си Пи” зэрэг 20 үйлдвэрийн үйл ажиллагааг түр зогсоож, лац тавьж битүүмжилсэн талаар мэдээлсэн билээ.
Чанар, стандартын шаардлага хангаагүй мах, махан бүтээгдэхүүний асуудалтай холбогдуулан Монголын махны холбооноос мэдээлэл хийлээ.
Монголын махны холбооны гүйцэтгэх захирал Б.Очирбат: Маханд химийн бодис хольсон үйлдвэр манай холбоонд нэгдэлгүй байдаг. Холбоонд багтдаг махны үйлдвэрүүд долоо хоног тутам бүтээгдэхүүнээ лабораториор шинжлүүлдэг. МХЕГ, Мал эмнэлгийн ерөнхий газар, Монголын махны холбоо хамтраад үе үе хяналт, шалгалт явуулдаг. Экспорт хийх үйлдвэрүүдийг тухайн орноос тусгай баг ирж шалгадаг. Зөвхөн импортлогч орны саналаар дулааны аргаар боловсруулж, хөлдүү, түүхийгээр гаргадаг. Лабораторийн бүх шинжилгээг хийж гаргаж байгаа.
“Мах маркет” ХХК-ийн гүйцэтгэх захирал Л.Болор: Монголын махны холбоонд 60 гаруй компани гишүүнчлэлтэй байдаг. Бүх компани Олон улсын хүнсний аюулгүй байдлын тогтолцоо, ISO стандартыг нэвтрүүлсэн.
Бид өдөр болгон түүхий эдээс эхлээд эцсийн бүтээгдэхүүн болох хүртэл дээж авч, 100 гаруй нэр төрлийн шинжилгээнд хамруулж хэрэглэгчдэдээ нийлүүлдэг.
Тиймээс олон нийт, ард иргэддээ хандаж хэлэхэд үндэсний үйлдвэрлэлийн бүтээгдэхүүн ямар ч эргэлзээгүй шүү. Хиам, хиаман бүтээгдэхүүнийг хэрэглэж болохгүй гэж бүү туйлшраасай. Бид ямар ч эргэлзээгүй, аюулгүй бүтээгдэхүүн үйлдвэрлэж байгаа.