Ардын жүжигчин Ш.Чимэдцэеэ болон Ардын жүжигчин Д.Түвшинжаргал нарын гэр бүлийн маргаан олны анхааралд орж, Ардын жүжигчин Ш.Чимэдцэеэ хэд хэдэн удаа хэвлэлд хандаж байсан билээ.
Тэгвэл уг асуудал одоо ч бүрэн шийдэгдээгүй байгаа бололтой. Хэдхэн хоногийн өмнө “ДУУНД ЗАЛБИРСАН ТАВИЛАН“ тоглолтоо хийсэн дуучин Ш.Чимэдцэеэ фейсбүүк хуудсандаа дараах мэдээллийг оруулжээ.
Тэрбээр “Сайн байцгаана уу Эрхэм монголчууд минь. Яачихсан хууль шүүх, яачихсан шийдвэр биелүүлэх, ямар гээчийн их шуналтай хүн энэ тэр гэхээрээ ийм байдаг байнаа. “Дуунд залбирсан тавилан” тоглолт хийсний маргааш шүүхийн шийдвэр биелүүлэх газраас Төгөлдөр гэгч залуу ирж таны нөхөр байсан Түвшинжаргал гэдэг хүн 2 хоноод л надруу залгаад шүүхийн шийдвэрээ биелүүлээч гээд утасдаад байнаа. Хоол хамт идэж ярилцаж сууя гээд байнаа.
Та одоо 93 сая төгрөг өгөх дутуу. Танд газар байна уу. Таны унаж байгаа машин таны нэр дээр байдаг уу гэж нилээн айлгаж байлаа. Тэгэхээр нь би тэтгэвэрийнхээ тал мөнгөөр сар алгасахгүй төлж байгаа. Өөр арга байхгүй шүү гэтэл та одоо тоглолт хийгээд баяжсан, гэхээр нь ийм ийм зардал гарсан зардлаа ч нөхөж чадаагүй байна гээд зардлын баримтаа үзүүлтэл таны машин дээр шийдвэр биелүүлэх ажиллагаа явуулна гээд гарсан. Гэтэл 5р сарын 23нд тэтгэвэрийн дансыг минь хаачихсан. Би тэтгэвэрийн дансанд үлдсэн мөнгөө авдаггүй юм. Яагаад гэвэл том ач минь 12р анги төгсөнө. Сурлагандаа гайгүй юм гадагш аятайхан сургуульд явуулчихвал дүү нартаа дэм болох байх гэж бодоод түүндээ хадгалж байлаа. Гэтэл миний тэтгэврийн дансан дээр ажиллагаа явуулчихаж. Ямар хэцүү хорвоо вэ. Ямар ханаж цаддаггүй шунал вэ. Би уул нь тэр хүнийг унах унаадтай, эд хогшил бараг насаараа идэх юмтай болгосон доо. Одоо би яах вэ, яаасан дээр юм бол” гэжээ.
