Засгийн газраас өргөн барьсан Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийг маргаашнаас хэлэлцэж эхлэхээр болоод буй.
Дагалдах хууль болох Прокурорын хуульд заавал прокурорын албан тушаал хашиж байсан хүн Улсын Ерөнхий прокуророор томилогддог байх гэдэг заалтыг өөрчилөхөөр тусгасан байна.
Тодруулбал, Прокурорын тухай хуулийн 45 дугаар зүйлийн 45.4 дэх хэсгийг “прокурорыг” гэснийг “Монгол Улсын иргэнийг” гэж өөрчлөхөөр тусгажээ.
Прокурорын тухай хуулийн 45.4 дэх хэсэгт “Хуульчийн мэргэжлээр 10-аас доошгүй жил ажилласан, гучин таван насанд хүрсэн прокурорыг Улсын ерөнхий прокурор, түүний орлогчоор томилно” хэмээн заасан байдаг.
Энэхүү өөрчлөлт нь улстөрч Улсын ерөнхий прокурорт нэр дэвших, томилогдох хуулийн цоорхой үүсэх вий гэсэн хардлагыг төрүүлээд байгаа юм.
Энэ талаар УИХ-ын гишүүн Б.Энхбаяр хэвлэлд байр сууриа илэрхийлээд байгаа билээ.
Тэрбээр, “Прокурор бол шүүх эрх мэдлийн бүрэлдэхүүн хэсэгт ордог. Шүүх эрх мэдэл улс төрөөс ангид, хараат бусаар үйл ажиллагаа явуулах учиртай. Улстөрийн албан тушаал хашиж байсан хүмүүс шүүх эрх мэдлийн оройд залардаг байж болохгүй.
Улстөрийн намын дарга байсан Д.Дорлигжав Ерөнхий прокурор болоод тухайн үедээ МАН-ын гишүүнчлэлтэй 18 аймгийн Засаг даргад хэрэг үүсгэж байсан гэж яригддаг шүү. Хичнээн сая долларыг рекэтлэж, шантааж хийсэн. Тэрийг нь яриад байдаг ч шалгадаггүй” гэсэн юм.