Хүүхдийн төлөө фондын мөнгө яг юунд зарцуулагддаг, яаралтай гадагшаа явж эмчлүүлэх шаардлагатай байгаа хүүхдүүдийн эмчилгээний зардлыг уг фондоос зарцуулж болдоггүй юм уу гэх асуудал нийгэмд хөндөгдөөд байна.
Уг фондын орлогын эх үүсвэр нь улсын төсөв, хандив тусламж, автомашины “азын” дугааруудын дуудлага худалдааны борлуулалтаас бүрддэг бөгөөд сангийн зарлагыг хуульчилж өгсөн байдаг аж.
Тодруулбал, сангийн хөрөнгөөр санхүүжүүлэх төсөл, арга хэмжээ нь:
3.1.Сангийн хөрөнгийг Засгийн газрын тусгай сангийн тухай хуулийн 212.3-т заасан дараахь арга хэмжээг санхүүжүүлэхэд зарцуулна;
3.1.1.хүүхдэд зориулсан бүтээн байгуулалтыг санхүүжилтээр дэмжих;
3.1.2.олон улс, тив, дэлхийн соёл, урлаг, спортын уралдаан тэмцээн, наадамд амжилт гаргасан хүүхдийг шагнаж урамшуулах;
3.1.3.олон улс, тив, дэлхийн соёл, урлаг, спортын уралдаан тэмцээн, наадамд оролцох бэлтгэл хангаж байгаа болон оролцох болзол хангасан хөгжлийн бэрхшээлтэй хүүхдэд дэмжлэг үзүүлэх юм.
Тиймээс хууль эрхзүйн талаас авч үзвэл уг сангийн мөнгийг эмчилгээний зардалд зарцуулах боломжгүй аж.
Хөдөлмөр, нийгмийн хамгааллын сайд А.Ариунзаяагийн мэдээлснээр одоогийн байдлаар хүүхдийн төлөө фондод 5,5 тэрбум төгрөг төвлөрсөн байгаа юм байна.