“УБ Сонгдо” эмнэлгийн Дотоод шүүрлийн их эмч М.Солонго чихрийн шижин өвчний талаар мэдээлэл өглөө.
– Ямар хүмүүсийг чихрийн шижинд өртөх эрсдэлтэй гэж үздэг вэ?
– Жин ихтэй хүмүүс чихрийн шижин тусах эрсдэлтэй байдаг. Хэвлийн тойргийн хэмжээ нь эмэгтэй хүнийх 80 см, эрэгтэй хүмүүсийнх 90 см бол нэгдүгээр эрсдэлтэй гэж үзнэ. Мөн даралт ихэсдэг, цусны сахар нь ихэсдэг, олон цагаар суугаа ажил эрхэлдэг, хөдөлгөөний идэвх сул, эрэгтэй бол сахараа хянуулах нь зүйтэй. Эдгээр нь эрсдэлийн гурваас илүү нь байгаа бол чихрийн шижин тусах дундаас дээш эрсдэлтэй бүлэгт орно. Харин зургуулаа байгаа бол эрсдэл өндөртэй бүлэгт хамаарна.
– Амьдралын хэв маяг чихрийн шижин үүсэхэд нөлөөлдөг үү?
– Сүүлийн үед хийжүүлсэн ундаа, түргэн хоол их хэрэглэдэг болчхоод байна л даа. Энэ нь нөгөө таргалалтыг л нэмэгдүүлээд байгаа юм. Мөн хөдөлгөөн багатай, олон цагаар сууж ажилладаг хүмүүст таргалалт үүсээд байна. Харин таргалалт нь чихрийн шижин үүсэхэд нөлөөлдөг эрсдэлт хүчин зүйл юм. Түүнчлэн удамд нь чихрийн шижин туссан хүн байдаг бол тусах эрсдэлтэй байдаг.
– Нэгэнт чихрийн шижинтэй нь оношлогдсон бол ямар эмчилгээ хийлгэх вэ?
– Хэрэв оношлогдсон бол эхлээд түвшинг нь тогтооно. Улирлын буюу гурван сарын глюкозын дунджийг нь үзээд бага байвал хоолны дэглэмээр зохицуулна. Харин дунд түвшинд байвал нэг юм уу хоёр эмээр эмчилнэ. Маш өндөр байвал тариа болон хүчтэй үйлдэлтэй эмийн эмчилгээ хийдэг. Чихрийн шижингийн үед эмийн эмчилгээнээс гадна хооллолт, хөдөлгөөн маш чухал. Зарим хүмүүс дунд түвшинд хүрчхээд хөдөлгөөн, хоолоор эмчилнэ гээд мэргэжлийн эмчээс зөвлөгөө авахгүй яваад байдаг. Эсвэл эм ууж байгаа юм чинь болно гээд хөдөлгөөн, хооллолтоо орхигдуулсан байдаг. Тиймээс мэргэжлийн эмчээс өөрт тохирсон зөвлөгөө авах хэрэгтэй.
Хүмүүс би чихрийн шижинтэй юм чинь насан туршдаа хоолны дэглэм барих нь гээд шантардаг. “Яаж би бусад хүмүүсийн идэж байгаа юмыг идэхгүй, байнгын бүхэл үрийн талх, хар мах идэх вэ” гэдэг. Идэж уух зүйлээ идэж болно. Гэхдээ огт хэрэглэж болохгүй, өөрт тохирохгүй зүйлсээ эмчээс асуух хэрэгтэй. Өдөр тутам хэрэглэдэг хүнсний 70-аад хувийг өөрт тохирсон хэмжээгээр хэрэглэж болно. Чихрийн шижингийн хооллолтын талаар мэргэжлийн зөвлөгөө өгдөг хүмүүс байгаа. Тэднээс зөвлөгөө авах нь зүйтэй.
– Чихрийн шижингийн хэлбэрүүдийн талаар мэдээлэл өгнө үү?
– Чихрийн шижин нь I, II хэлбэр нэг, хоёрын завсрын хэлбэр, бусад шалтгааны улмаас үүсэн хэлбэр гээд дөрвөн том бүлэгт хуваагдаж байдаг. Нэгдүгээр хэлбэрийн чихрийн шижин нь ихэнхдээ 0-18 хүүхдэд тохиолддог. Өөрөөр хэлбэл нойрбулчирхайнаас ялгардаг инсулин хэмээх сахар зохицуулах бодисын төрөлхийн дутагдалтай хүмүүс гэсэн үг.
Харин II хэлбэрийн чихрийн шижин нь нийт өвчлөлийн 90-ээс дээш хувийг эзэлдэг. Энэ нь амьдралын явцад үүсдэг бөгөөд 35-аас дээш насныханд ихэвчлэн тохиолддог. Бодисын солилцооны өөрчлөлт буюу эхэнд дурдсан эрсдэлт хүчин зүйлс үүнд нөлөөлдөг.
Сүүлийн үед чихрийн шижингийн нэг, хоёрын завсрын хэлбэр буюу 1.5 нь их тохиолдох болсон. Энэ нь 20-35, заримдаа 45 нас хүртэл оношлогдож байна. Бусад гэдэгт инсулин дааврыг дарангуйлдаг эмүүд хэрэглэдэг, нойр булчирхайн мэс засалд орсны нөлөөгөөр үүссэнийг хэлнэ.
– Чихрийн шинжингээс хэрхэн урьдчилан сэргийлэх вэ?
– Дээр дурдсан эрсдэлт хүчин зүйлээс л хол байна.
- Хөдөлгөөн хийнэ
- Жингээ барина
- Зөв хооллоно
- Эрсдэлт хүчин зүйл байгаа урьдчилан сэргийлэх үзлэгт хамрагдана.
Эх сурвалж: УБ Сонгдо
