Дайны нөхцөл байдалд байгаа Украин улсаас иргэдээ татаж авах асуудлаар Засгийн газар ээлжит бусаар хуралдсан байна. Хуралдаанаас гарсан шийдвэрийг Б.Батцэцэг сайд танилцууллаа.
Тэрээр “Украинд манай улсын 68 оюутан сурч байгаа. Мөн 22 иргэн байнга амьдардаг. Байнга оршин суудаг иргэд эх орондоо ирэх хүсэлт гаргаагүй.
Оюутнуудтай сарын өмнөөс ГХЯ холбогдож ажиллаж байгаа. Сарын хугацаанд нөхцөл байдалд хүндэрч болзошгүйг сануулж, оюутнуудаа эх орондоо ирэх зөвлөмж өгсөн.
Мөн нөхцөл байдал хүндэрсэн тохиолдолд ямар арга хэмжээ авах талаарх мэдээллийг өгч ажилласан. Өнгөрсөн хугацаанд 41 оюутан эх орондоо ирсэн. Одоогоор Украинд 27 оюутан байна. Тэдгээр оюутнууд янз бүрийн шалтгаанаар эх орондоо ирэх шийдвэр гаргаж чадахгүй өнөөдрийг хүрсэн.
Ихэвчлэн төгсөх курсийн оюутнууд болон хэлний бэлтгэл хийж байгаа хүүхдүүд эх орондоо эргэж ирэх шийдвэр гаргаагүй байна. Монголын цагаар 12.00 цагийн үед довтолгоо эхэлсэн.
Хүүхдүүд айдастай байна. Одоогоор олон улсын нислэгүүд цуцлагдсан байгаа. Бид эхний ээлжид энэ сарын 26, 27-ны нислэгт 21 суудал захиалсан. Тус нислэгээр ирэх оюутнуудын зардал, мөнгөний асуудлыг өнөөдрийн Засгийн газрын хуралдаанаар оруулсан. Зургаан оюутны суудлыг дараагийн нислэгт захиалсан. Нисэж болохгүй тохиолдолд иргэдийг Польш улсаар дамжуулан авах арга хэмжээ авахаар төлөвлөж байна. Одоогоор ямар нэг эрсдэлд орж, халдлагад өртсөн монгол болон гадаад хүн байхгүй байгаа” гэлээ.
