Л.Санжаасүрэн: Хамар битүү үед тархи, зүрхэнд очих хүчилтөрөгчийн хэмжээ багасдаг

0
2599

ТТАНЭ-ийн уламжлалт анагаах ухааны тасгийн их эмч Л.Санжаасүрэнгийн өгсөн зөвлөгөөг хүргэж байна.

 Хамрын битүүг арилгахын тулд ямар цэгүүд дээр массаж хийх нь зохимжтой вэ?

– Хамрын эргэн тойронд зүүний цэгүүд гэж бий. Тэдгээр цэгүүд дээр ган, алт, мөнгө гэсэн метал биетүүдээр цочроож, өөрөөр нь сэдрээж эмчилдэг. Харин гэрийн нөхцөлд зүү тавьж болохгүй учир тухайн цэгүүд дээр массаж хийж болно. Доорх зурагт байгаа 5,6,8 гэсэн цэгүүд дээр дарж массажлаарай. Эдгээр цэгүүдийг байнга  массаж  хийснээр цусан хангамж сайжирч, хамрын битүү арилна. Мөн гоо сайханд ч эерэг нөлөө үзүүлнэ. Товчхондоо бол хамрыг цэвэр, амьсгалахад чөлөөтэй байлгах л ёстой. Тэгж байж л хамар дайврыг үрэвслээс сэргийлж чадна.

– Хамрын дайван хөндийн үрэвслийг эмчлэхгүй удвал ямар сөрөг нөлөөтэй вэ?

– Хамрын дайван хөндийн үрэвслийг эмчлэхгүй удвал дээшээ духны хөндийрүү орж аюултай нөхцөлд хүргэнэ. Тиймээс бага дээр нь буюу хамар битүүрэх, өтгөн ногоон нус гарах зэрэг шинж илэрсэн тохиолдолд нэн даруй мэргэжлийн эмчид хандах хэрэгтэй. Эмч танд тохирсон антибиотик, хамрын дусаалга зэргийг зөвлөх болно.

Эрчүүд сайн мэдэх байх. Машины агаар шүүгч битүүрэхээр машин хүчгүй болчихдог шүү дээ. Яг түүнтэй ижил хүний хамар битүү үед тархи, зүрхэнд очих хүчилтөрөгчийн хэмжээ багасдаг. Үүнтэй холбоотойгоор ажлын бүтээмж муудах, уур уцаар хүрэх, стресстэх, нойргүйдэх зэрэг олон төрлийн хүндрэл гарч эхэлнэ. Хамар битүүрсэн гээд хүн сонсоход энгийн зүйл мэт боловч цаашдаа гарах үр дагавар нь их. Тиймээс та бүхэн хамрын хөндийгөө цэвэрлэж байх нь зүйтэй.

– Хүүхдийн хамар амархан битүүрдэг. Энэ тохиолдолд ямар арга хэмжээ авах вэ?

– Хүүхдийн хамрыг битүү байлгаж болохгүй, ялангуяа нярай хүүхдийн. Шинэ, залуу аав ээж нар хүүхэд уйлаад байна гээд л ирдэг. Гэтэл хүүхдийг үзэхэд чих нь өвдчихсөн байдаг. Шалтгаан нь ерөөсөө л хамрын битүү. Хамрыг нь байнга зөв цэвэрлэж, тосолж арчилж байхгүй бол хүүхдийн чих маш амархан өвддөг.

Хамар нь битүү хүүхэд хөхөө хөхөж чаддаггүй. Тиймээс хамрыг нь сайн шалгаж, хөхөө хөхөж байхад нь харах хэрэгтэй.

Түүнчлэн өсвөр насны хүүхэд, том хүн ч ялгаагүй нусаа хэт их нийснээсээ болоод хэнгэргээ цоолчихдог. Ингээд дараагийн хүндрэл гардаг. Тийм учраас хамрыг л маш сайн арчилж, цэвэрлэх хэрэгтэй.

Баярлалаа.