Энэ удаагийн “Хүмүүс” буландаа Өмнөд Солонгосын жүжигчин Жо Ин Суныг онцолж байна.
“Балид болсон явдал”, “Төгөлдөр хуур” “Зүгээрээ, Энэ бол хайр” зэрэг телевизийн олон ангит кинонуудын гол дүрээр бидний танил болсон жүжигчин Жо Ин Сун 1981 оны 7-р сарын 28-нд төрсөн. Жо Ин Сун Сөүлийн уугуул бөгөөд сагсан бөмбөг, таэквондогоор хичээллэдэг байжээ.
Тэрээр “Chunnam Techno” их сургуульд менежментийн чиглэлээр суралцаж байсан. Харин дараа нь “Dongguk” их сургуульд театр, кино урлагийн мэргэжлээр элссэн боловч 2007 оны хичээлийн ирц хүрээгүй тул сургуулиасаа хөөгджээ.
Жо Ин Сун 1998 онд “Ziozia” брэндийн хувцасны моделиор урлагийн гараагаа эхэлсэн. Харин дараа нь 2000 онд “Hakgyo 3”, “NONSTOP” ситкомын хоёрдугаар ангид тоглож, кино карьераараа эхлүүлжээ.
Тэрээр анх 2001 онд “Төгөлдөр хуур” кинонд туслах дүрд тоглож олны анхаарлыг татаж байв. Харин 2004 онд Ха Жи Вон , Со Жи-соб нартай хамт “Балид болсон явдал” кинонд тоглосноор нэр хүнд нь улам өссөн гэдэг. “Балид болсон явдал” кино маш их амжилтад хүрч, тэрээр “Baeksang Arts Awards” болон “SBS Drama Awards”-аас шилдэг эрэгтэй жүжигчний шагналыг тус тус хүртжээ.
Мөн түүний тоглосон хамгийн алдартай киноны нэг бол “Зүгээрээ, Энэ бол хайр” юм. Тэрээр уг киногоороо “APAN Star Awards”-аас телевизийн хамгийн нэр хүндтэй шагнал болох Daesang (Grand Prize)-г хүртжээ.
Тэрээр одоогоор ганц бие ч гэлээ өмнө нь жүжигчин Kim Min hee-тэй үерхэж байсан. Тэд агентлагаараа дамжуулан болзож байгаа талаараа мэдэгдэж байсан ч 2014 оны 9-р сард салсан гэдгээ зарлажээ.
Тэрээр нэгэн нэвтрүүлгийн үеэр яагаад салсан тухайгаа тайлбарлахдаа “Би эмэгтэйчүүдийн талаар сайн мэдэхгүй. Тийм л учраас хэдэн сарын өмнө бид салсан юм ”гэсэн байдаг.
