Ревматоид артрит нь аутоиммуны гаралтай, үе өвдөх, хавдах мөн хөшүүн болж хөдөлгөөн нь хязгаарлагдах зэрэг шинж тэмдэг илэрдэг архаг явцтай, хамгийн түгээмэл тохиолддог үений үрэвсэлт эмгэг юм. АНУ-д сая гаруй хүн уг өвчнөөр оношлогдсон гэсэн судалгаа бий. Ревматойд артритын үед эмийн эмчилгээ хийдэг. Мөн амралт, тогтмол дасгал хөдөлгөөн, хоолны дэглэм чухал нөлөөтэй. Тиймээс ревматоид артриттай үед зайлсхийх ёстой хоол хүнсийг онцолж байна.
Түргэн хоол
Бургер, шарсан төмс зэргийг авахаас зайлсхийх хэрэгтэй. Түргэн хоол нь зүрх судасны өвчин, чихрийн шижин өвчний эрсдлийг нэмэгдүүлдэг, өвчнийг даамжруулдаг. Таны дуртай түргэн хоолонд транс өөх, хадгалах хугацааг уртасгагч бодис ихээр агуулагддаг. Энэ нь “муу” холестерины түвшинг (зүрх судасны өвчлөлд хүргэж болзошгүй) нэмэгдүүлэхээс гадна бие махбодийн үрэвслийг өдөөж болно гэж WebMD-д тэмдэглэжээ.
Улаан мах
Олон хүмүүс дулааны улиралд шарсан мах, стейк ихээр иддэг. Үхрийн мах, гахайн мах, хурга болон бусад төрлийн мах нь уураг болон чухал амин дэмийн эх үүсвэр болдог ч сүүлийн үеийн судалгаагаар хорт хавдар гэх мэт зарим эрүүл мэндийн асуудалтай холбоотой талаар яригдах болжээ.
Мэргэжилтнүүд мах нь ханасан өөх тос, омега-6 тосны хүчил ихээр агуулдаг тул үрэвслийг улам сэдрээдэг гэж тайлбарлаж байна. EverydayHealth-д дурьдсанаар “Ревматоид артриттай хүмүүс хоолны дэглэмдээ улаан махны хэрэглээг багасгахад шинж тэмдгүүд нь буурсан гэж мэдээлсэн” гэжээ.
Жигнэмэг/ нарийн боов
Жигнэмэг, нарийн боов нь уг өвчний өвдөлтийг нэмэгдүүлдэг аж. Энэ нь цэвэршүүлсэн сахар ихээр агуулдагтай холбоотой бөгөөд үрэвслийг өдөөх, сэдрээх шалтгаан болдог гэж HealthGrades-д тэмдэглэжээ. Таны худалдан авч буй хоол хүнсэнд цэвэршүүлсэн сахар байгаа эсэхийг тодорхойлохын тулд шошгон дээрх фруктоз болон “ose” -ээр төгссөн бусад орцыг хянаж сурах хэрэгтэй.
Ундаа, хийжүүлсэн ус
Түргэн хоолны багцыг дагалдан ирдэг ундаа нь цэвэршүүлсэн сахар ихээр агуулдаг гэдгийг HealthGrades-ээс мэдээлэв. WebMD-д мэдээлснээр хийжүүлсэн ундаа, жүүс гэх мэт “чихэрлэг ундаа” нь ревматоид артрит үүсгэх өндөр эрсдэлтэй гэж тэмдэглэжээ. Судалгаагаар өдөр бүр нэг буюу хэд хэдэн лааз сахрын агууламж өндөртэй ундаа уудаг эмэгтэйчүүдэд ревматойд артритын эрсдэл нэмэгдэхээс гадна чихрийн шижин, зүрхний өвчин болон бусад өвчний эрсдэлийг нэмэгдүүлдэг аж.
Талх, паста
Талх, гоймон нь глютен /цардуул/ихээр агуулдаг бөгөөд энэ нь зарим хүмүүсийн эрүүл мэндийн асуудалд хүндрэл, сөрөг нөлөө үүсгэж байдаг гэж HealthGrades сайтад тэмдэглэжээ. Тиймээс цардуулын агууламж багатай гоймон, талх хэрэглэхийг зөвлөж байна.
Согтууруулах ундаа
Ревматойд артритын үед шар айраг болон бусад согтууруулах ундааны зүйлсийг хэтрүүлэн хэрэглэхээс зайлсхийх олон шалтгаан бий гэж EveryDay Health-д тайлбарлав. Согтууруулах ундааг хэтрүүлэн хэрэглэх нь С-реактив уураг үүсгэдэг бөгөөд энэ нь “үрэвслийн хүчтэй дохиог” болдог гэж эх сурвалжид тэмдэглэжээ.
Сүү, сүүн бүтээгдэхүүн
Сүү, сүүн бүтээгдэхүүн нь амин дэм, уураг, кальци бусад шим тэжээлийн эх үүсвэр. Гэвч зарим хүмүүсийн хувьд хоол боловсруулахад асуудал үүсгэдэг гэнэ. EveryDay Health-д тэмдэглэснээр сүү, сүүн бүтээгдэхүүн ихээр хэрэглэх нь үрэвслийг нэмэгдүүлдэг гэжээ. Ялангуяа тослог ихтэй сүү. Тиймээс бүйлсний сүү болон бусад тослог ихтэй сүүнээс татгалзахыг зөвлөж байна. Тослог багатай сүү нь сөрөг нөлөөгүй.
Давсалсан хүнс
Давсалсан хүнс хэрэглэх хүсэл нь чихэрлэг хүнс хэрэглэхтэй адил юм . Ингэснээр шарсан төмс, чипс, пицца зэрэг натри ихээр агуулсан хүнсийг сонгодог. Давсны хэт их хэрэглээ, хадгалалтын уртасгагч бодис зэрэг нь үрэвсэл үүсгэдэг аж. Мөн боловсруулсан олон төрлийн хүнсний бүтээгдэхүүн нь MSG, натри ихээр агуулдаг тул үрэвслийг өдөөж болно гэдгийг хэд хэдэн судалгаанд тэмдэглэжээ.
Кофе
АНУ-д 180 сая гаруй хүн кофег тогтмол хэрэглэдэг гэсэн судалгаа байдаг. Гэхдээ энэ нь ревматойд артритын шинж тэмдгийг бага багаар нэмэгдүүлж, өвчнийг улам дордуулж болзошгүй гэж EverydayHealth-д тэмдэглэжээ. Та кофены хэрэглээгээ багасгаж, нөхцөл байдал сайжирч байгаа эсэхийг хянах боломжтой. Гэхдээ кофены хэрэглээгээ гэнэт зогсоосноор толгой өвдөх, түгших, уухгүй л бул эрч хүчгүй байгаа мэт санагдах зэрэг шинж тэмдгүүд илэрдэг аж.
Эх сурвалж: activebeat
