Сүүлийн үеийн судалгаагаар стрессээс үүдэлтэй гормон нь хавдрын эсүүдийг сэргээдэг болохыг тогтоожээ.
Судлаачид хавдрын эмчилгээ хийснээс хойш дахин хавдар үүсч буй шалтгаан, идэвхгүй далд хэлбэртэй байгаа хавдрын эсийг чухам юу идэвхжүүлж дахин сэргээгээд байгааг судалж, шинэ таамгуудыг дэвшүүлсээр байна. Харин сүүлийн судалгаагаар стрессийн зарим дааврууд эдгээр эсийг сэрээх үйл явцын гинжин холбоог үүсгэж болзошгүйг тогтоожээ. Хорт хавдрыг хэчнээн үр дүнтэй сайн эмчилсэн ч хүний мах бодод хавдрын эсүүд чимээгүйхэн нуугдаад байж л байдаг. Тэгээд хэзээ нэгэн өдөр тохироо нь бүрдэнгүүт дахин идэвхжиж гарч ирдэг бөгөөд харин тэднийг юу, ямар механизм тэгж идэвхжүүлдгийг эрдэмтэд судалсаар байна.
Нэгэн шинэ судалгаагаар нь полиморф цөмийн нейтрофил (РМН) гэж нэрлэгддэг дархлааны эсийн тодорхой төрөлд хавдрын эс төвлөрч байгаад дахин сэргэдэг гэсэн таамаглал дэвшүүлжээ.
Амьтад дээр хийсэн туршилтаар идэвхгүй байгаа хавдрын эсүүдийг PMN-ээс ялгардаг липидийн төрлөөр сэргээж болохыг тогтоосон байна. Үүний дараа судлаачид эдгээр липидийг ялгаруулах дархлааны эсүүдийг өдөөж болох зүйлийг судалж үзсэн бөгөөд гол өдөөгч нь норэпинефрин хэмээх стрессийн даавар болохыг ойлгожээ.
Судлаачид уушгины хорт хавдраар өвчилсөн 80 өвчтөнийг судалж үзсэний 17 нь харьцангуй эрт дахиж хавдраар өвчилсөн байна. Эмчилгээ хийлгээд удаан хугацааны дараа дахиж өвчилсөн өвчтөнүүдтэй харьцуулахад удалгүй дахин хорт хавдраар өвчилсөн өвчтөнүүдийн цусан дахь липидийн түвшин харьцангуй өндөр байсан ажээ.
“Хорт хавдрын эрт үеийн дахилттай өвчтөнүүдийг дахилтгүй, удаан хугацааны дараа дахисан өвчтөнүүдтэй харьцуулахад стрессийн дааврын түвшин, цусан дахь нейтрофилийн идэвхжүүлэгчийн маркерууд илүү өндөр байгааг бид олж мэдсэн” гэж шинэ судалгааны удирдагч Микела Перего тайлбарлав.
Перегогийн хэлснээр стресс нь өөрөө хорт хавдрын идэвхгүй байгаа эсийг сэргээх үүрэгтэй гэсэн үг биш харин хавдрын эсийг сэрээхэд хувь нэмэр оруулдаг ямар нэг гинжин хэлхээг сэргээдэг гэжээ.
“Хорт хавдрын эмчилгээ хийлгэж буй өвчтөнүүдийн стрессийн дааврын түвшин, нейтрофилийн үйл ажиллагааг хянах нь маш чухал ач холбогдолтой гэж бид бодож байна” гэж Перего нэмж хэлэв.
Эх сурвалж: newatlas