PLOS ONE сэтгүүлд нийтлэгдсэн шинэ судалгаагаар хүүхэд асран хамгаалагчаасаа хэл сурдаг, гэхдээ тэдэнтэй хэр их ярих нь бус, хэрхэн хариу үйлдэл үзүүлэх чухал нөлөөтэй болохыг тогтоожээ.
Насанд хүрэгчдийн дуу авианы хариу үйлдлийг хүлээн авсан хүүхдүүд “бүтээлч үгсийн сантай” байсан. Эцэг эхчүүд тэдний хэлсэн дуу авиа, үгтэй төстэй үгсийг хэлэх, дууриах, засах, өргөжүүлэх замаар хариу хэлэх нь үгсийн санг нь нэмэгдүүлдэг. Жишээлбэл, нялх хүүхэд “ба” гэж хэлбэл насанд хүрэгчид “ба”, “бөмбөг” эсвэл “тийм ээ, энэ бол том улаан бөмбөлөг” гэж хариулах замаар хүүхдийн сурах чадварт нөлөөлж байдаг.
АНУ-ын Калифорнийн Их Сургуулийн судалгаагаар эцэг эхчүүд хүүхэдтэй зүгээр л ярихаас илүүтэйгээр хүүхдийнхээ хэлсэн үгэнд хариулж, үг, өгүүлбэрийг засч залруулснаар хүүхэд хурдан хэлд ордог болохыг тогтоожээ. 13 сартай 53 хүүхдийг хамруулсан уг судалгааг гэрийн орчин нөхцөлд хийсэн бөгөөд үр дүн нь хүүхдийн хэл яриаг судлах туршилтын болон ажиглалтын судалгааны үр дүнтэй нийлж байв.
Хүүхэдтэйгээ ярих тусам үгийн баялаг нь нэмэгдэж, насанд хүрэгчдээс илүү хариулт хүлээн авч байв. Бүтэн үг, өгүүлбэрээр ярих нь хүүхдийг хэлд ороход чухал нөлөөтэй байна.
Хэлд орох гэж буй хүүхэдтэй харилцах дуу авианы үнэ цэнийг бууруулж болохгүй гэж судлаачид зөвлөж байна. Дөнгөж төрсөн хүүхэд уйлах, ханиалгах, бурах, найтаах зэрэг рефлексийн дуу авиа гаргадаг. Гурван сартайгаасаа эхлэн эгшиг авиануудыг гаргаж, ганганаж, бувтнадаг. Долоон сартайгаасаа эхлэн гийгүүлэгчээр холбогдсон үеүдийг хэлэн шулганаж ярилцах бөгөөд энэ үеэс эхлэн илүү ярианы шинжтэй болж эхэлдэг байна.
cosmosmagazine
