“Netflix”-ийн бас нэгэн цуврал шуугиан дэгдээж буй нь гоц авьяастан шатарчин охины тухай “The Queen’s Gambit” юм. Уг кино 7 ангитай мини цуврал бөгөөд нуршсан яриа, сунгжирсан үйл явдлаар таныг уйдаахгүй.
Кино бяцхан охин асрамжийн газарт ирж буйгаар эхэлж, манаач өвгөнтэй хамт шатар тоглосноор өөрийн нууц авьяасаа нээснээр үргэлжилдэг. Ингээд уг киног заавал үзэх хэрэгтэйг нотлох шалтгаануудыг хүргэе.
Гол дүрийг бүтээсэн Anya Taylor-Joy
1996 онд төрсөн 24 настай Америк, Аргентин гаралтай жүжигчин охины тоглолт үнэхээр таныг алмайруулна. Түүний шатрандаа дурлан бүхий л зүйлсээ зориулан амьдарч буй,тэмцээн дээрх түүний сандрал, догдлол, ялалт ялагдлын агшин үнэхээр гайхалтай.
Үнэнч нөхөрлөл
Асрамжийн газарт ирсэн өдрөөсөө эхлэн найзалсан бяцхан охидын үнэнч нөхөрлөл. Өдөр бүр холбоотой байдаггүй ч яг хэрэгтэй үед гарч ирдэг. Энэ чинь л гэр бүл шүү дээ гэх охидын ярианаас та хүн чанар, найз гэж чухам хэн бэ гэдгийг ухаарах болно.
Ээж охины төгс харилцаа
Өргөж авсан ээж охин хоёрын харилцаа тун хялбархан. Төрсөн ээж нь биш учраас ингэж охиноо буруу зүйлс хийлээ гэж хорьж цагдахгүй байгаа юм болов уу гэж бодогдох ч бүх л ээж охид ийм харилцаатай байвал үнэхээр зовлонгүй, хөнгөхөн, жинхэн найзууд шиг байж чадах юм байна гэж бодогдмоор.
Хувцаслалт, донж хэв маяг
Дүрүүдийн өмсөж буй хувцас үнэхээр дэгжин. Танд 1950-иад оны уур амьсгалыг бүрэн мэдрүүлэхийн дээр хувцас бүр онцгой хэв маягтай хийгджээ.
Хамгийн гоё нь ШАТАР
Энэ цувралыг үзсэн хүн бүр шатарт шохоорхоно. Шатрын олон нүүдэл, стратеги тоглолт, түүх, шатрын дэлхийн аваргууд гээд энэ киног үзсэн хүн бүр хайлт хийж үзнэ. Орост тэмцээнд оролцохоор очсон хэсэгт дүрслэгдэх гудамжинд суух шатарчин өвгөд, тэмцээний нүүдэл бүрийг догдлон хүлээн хүйтэн үдшээр гадаа зогсох олон хүмүүс. Шатар үнэхээр гоё.
Онцгой туслах дүрүүд
Хэд хэдэн киног дүр бүтээсэн ч улиг болтлоо гараагүй хэд хэдэн жүжигчин энэ киноны шигтгээ болсон туслах дүрүүдийг бүтээжээ.