УИХ-ын гишүүн Ш.Адьшаа “Ашигт малтмалын тухай хуулийн нэмэлт өөрчлөлтийн төслийг эргүүлэн татахыг шаардаж мэдээлэл хийлээ.
Тэрбээр “Засгийн газраас ашигт малтмалын хуулийн 42-р зүйлд “Нутгийн өөрөө удирдах байгууллагатай албан ёсны гэрээ байгуулж, хандив өгөх” тухай заалтыг оруулж ирсэн байна. Би хувьдаа энэ заалтад хардлагатай байгаа.
Энэхүү хуульд орон нутагт лиценз эзэмшигч компаниуд ажлын байр бий болгож Монголд гадаад улсын ажилчдыг авах харилцааны тухай асуудлыг оруулж ирсэн. Салбарын сайдаас нь санал авахгүйгээр хулгай, луйврын аргаар уг хуульд нэмэлт өөрчлөлт оруулсны цаана их том асуудал нуугдаж байна.
Мөн Ховд аймгийн иргэдийн төлөөлөгчид Хар ус нууруудын хотгорт газрын тосны хайгуулын ажил хийх тухай асуудлаар ээлжит бусаар хуралдаж байгаа.
“Хас”-ын Ч.Ганхуяг хоёр хоногийн өмнө Ховд аймгийн иргэдэд малын өвс тэжээл тараагаад явж байсан. Ч.Ганхуягийн дүү Ч.Гантулга гэдэг хүн Эрдэнэбүрэнгийн усан цахилгаан станцын ашиглалтын өмнөх цахилгааны дарга хийж байгаа. Ч.Ганхуяг гэнэт яагаад Ховд аймгийн иргэдэд хайр зарлаад, малчдад малын өвс, тэжээл тараагаад яваад байгаа юм. Үүнийг хүлээж авсан саяхан шинээр томилогдсон Ховд аймгийн Засаг дарга нь яагаад Ч.Ганхуягтай зургаа авхуулж, малчдад тусалж байгаа мэтээр яриад байгаа юм бэ.
Тиймээс Засгийн газраас уг төслөө татаж авахыг шаардаж байна. Баялгийн болон ашигт малтмалын хуулийг батлахдаа ард иргэд үүнээс хувь хүртэх асуудлыг л ярих ёстой. Хандив, тусламж, ажлын байраар хангах үүрэг нь олборлолт эрхэлж буй компанид байгаа шүү дээ. Ажлын байр, хандив тусламж гэсэн нэрээр уул уурхайг ард иргэдэд ашиггүйгээр ашиглах нөхцөлийг сэмхэн төсвийн хуулиар далимдуулаад оруулж ирсэнд би их харамсаж байна” гэлээ
